ანტიკრიზიული საბჭოს სხდომაზე მოწვეული ენერგეტიკისა და ბუნებრივი რესურსების მინისტრის, ალექსანდრე ხეთაგურისა და გარემოს დაცვის მინისტრის, გიორგი ხაჩიძის არგამოცხადებამ ანტიკრიზისული საბჭოს თავმჯდომარის, გიორგი თორთლაძის უკმაყოფილება გამოიწვია.
მისი თქმით, მინისტრები ერთი კვირით ადრე გააფრთხილეს და საბჭომ მხოლოდ გუშინ საღამოს მიიღო მათი პარლამენტში გამოუცხადებლობის შეტყობინება.
თორთლაძემ მიმართა შესაბამის სამინისტროებს, უახლოეს პერიოდში შეთანხმდნენ საბჭოს სხდომაზე გამოცხადების თარიღის თაობაზე.
სხდომაზე საქართველოს ზოგიერთ საკანონმდებლო აქტში ცვლილების შეტანის საკითხი უნდა განხილულიყო. თორთლაძის განცხადებით, ცვლილებების პროექტი ეროვნულ პარკებში ნადირობის დაშვებას და გადარჩენის პირას მყოფ ცხოველების დაცვასთან დაკავშირებული მუხლების ამოღებას გულისხმობს.
თორთლაძეს მიაჩნია, რომ პარლამენტში მთავრობის ინიციატივით შესული კანონპროექტის განხილვის დაწყებამდე საკითხი ანტიკრიზისული საბჭოს სხდომაზე საბჭოს წევრებმა და ექსპერტებმა ენერგეტიკისა და ბუნებრივი რესურსების მინისტრთან ალექსანდრე ხეთაგურთან და გარემოს დაცვის მინისტრისთან გიორგი ხაჩიძიესთან ერთად განიხილონ.
"მოვითხოვთ, შეჩერდეს კანონპროექტის განხილვა, ვიდრე მინისტრები კანონპროექტის ირგვლივ დასმულ შეკითხვებს პასუხს არ გასცემენ", - განაცხადა თორთლაძემ.