გალში ინციდენტების პრევენციისა და მათზე რეაგირების შეხვედრაზე აფხაზმა სეპარატისტებმა გალის რაიონის სოფელ ფახულანის მაცხოვრებლის 4 ივნისს დაკავებული თემურ ხასაიას საკითხი დააყენეს. აფხაზური მხარის მტკიცებით ხასაიას დაკავება უკანონო იყო. ინფორმაციას ამის შესახებ აფხაზეთის ე.წ. საგარეო საქმეთა სამინისტრო ავრცელებს.
"ამასთან ერთად, აფხაზურმა მხარემ ასევე დააყენა საკითხი, რომელიც 15 აპრილს საქართველოს სპეცსამსახურების მიერ გატაცებული და შემდეგ ტერორისმში ბრალდებული მერაბ ყოლბაიას დაპატიმრებას ეხებოდა.
ამას გარდა, აფხაზურმა მხარემ ასევე შეახსენა ქართულ მხარეს, რომ მათ უკვე არაერთგზის მიმართეს საქართველოს წარმომადგენლებს დამნაშავეების დაკავებისა და ერთმანეთისთვის გადაცების შესახებ ხელშეკრულების გაფორმების შესახებ", _ იუწყება აფხაზური მხარე.
სეპარატისტებმა ევროკავშირის სადამკვირვებლო მისიას დაკავების ადგილზე ყოლბაიას მონახულებაც სთხოვა.
შეხვედრაზე, ასევე მხარეებს წარუდგინეს ევროპული მონიტორინგის მისიის ახალი ხელმძღვანელი ანდჟეი ტიშკევიჩი, რომელმაც რეგიონში არსებული სტაბილური მდგომარეობის გამო კმაყოფილება გამოთქვა.
