რუსეთში უფრო მეტი რევანშიზმი და რევიზიონიზმი გაჩნდა. ამის შესახებ საქართველოს პრეზიდენტმა მიხეილ სააკაშვილმა ტელეკომპანია MSNBC-ს ეთერში განაცხადა. მისი თქმით, რუსეთი ყოფილ საბჭოთა კავშირში გავლენის გარკვეული სფეროების აღდგენას ცდილობს.
"20 წელი გავიდა რაც საბჭოთა კავშირი აღარ არის. თავის დროზე ეს ბრძეჟინსკიმ იწინასწარმეტყველა მაგრამ არავინ დაუჯერა. რა თქმა უნდა, 11 სექტემბრიდან 10 წლის გასვლაც აღსანიშნავია. ორივე შემთხვევაში ამბობდნენ, რომ ეს ისტორიის დასასრული იყო, თუმცა რა თქმა უნდა ისტორია არ დამთავრებულა და ბევრი ტრაგიკული ამბებიც ხდება. მიუხედავად 20 წლის გასვლისა ბევრი რამ გაუარესდა. რუსეთში უფრო მეტი რევანშიზმი და რევიზიონიზმი გაჩნდა. ყოფილ საბჭოთა კავშირში გავლენის გარკვეული სფეროების აღდგენას ცდილობენ. ხდება ტერორისტული თავდასხმები", - განაცხადა სააკაშვილმა.
მისი თქმით, კარგია, რომ არაბული გაზაფხულით ამ რეგიონებში დემოკრატიზაციის ტალღის შანსი გაჩნდა.
"ეს ალბათ ყოფილი საბჭოთა იმპერიისთვისაც რელევანტურია", - დასძინა საქართველოს პრეზიდენტმა.
