საქართველოს პარლამენტის თავმჯდომარის დავით ბაქრაძის განცხადებით, იგი მოხარულია, რომ ბრიტანეთის პრემიერ-მინისტრმა დევიდ კემერონმა თავისი სიტყვა შეასრულა და რუსეთის პრეზიდენტ მედვედევთან შეხვედრისას საქართველოს საკითხი დააყენა.
"ჯერ კიდევ ერთი კვირის წინ კემერონს პარლამენტში გამოსვლისას საქართველოს შესახებ დაუსვეს კითხვა და მან პირობა დადო, რომ ამ საკითხს მედვედევთან შეხვერდისას დააყენებდა. მოხარული ვარ, რომ მან სიტყვა შეასრულა და კიდევ ერთხელ დააფიქსირა, რომ საქართველოს საკითხი რუსეთსა და დემოკრატიულ მსოფლიოს შორის ფუნდამენტურ განსხვავებად რჩება. კომიკურია თვითონ ის ფაქტი, თუ რუსეთი როგორ ცდილობს ამ ფაქტის მიჩქმალვას, როდესაც სტენოგრამის ეს ნაწილი გადამალეს. მისი დამალვა სიტუაციას ვერ უშველის", - განაცხადა ბაქრაძემ.
მისი თქმით, ფაქტია, რომ ყველა მაღალი დონის შეხვედრაზე საქართველოს საკითხი დღის წესრიგში დგას.
"ადრე თუ გვიან რუსეთს მოუწევს დემოკრატიული სახელმწიფოების აზრი გაითვალისწინოს", - დასძინა პარლამენტის თავმჯდომარემ.
