საპარლამენტო უმრავლესობის ერთ-ერთი ლიდერის, დავით დარჩიაშვილის განცხადებით, საქართველოში ეთნიკური უმცირესობების ენების რეგიონალურ ენებად აღიარების საკითხზე მუშაობა მიმდინარეობს.
"ჩვენ ეროვნულ უმცირესობებთან მიმართებაში გვაქვს ორი დოკუმენტი, ერთი „ეროვნულ უმცირესობათა კონვენციაა", რომლის რატიფიცირებაც პარლამენტმა ევროსაბჭოში მიღებამდე მოახდინა (1998 წელს) და მეორე „რეგიონალურ ენათა ქარტია", რომელიც რატიფიცირებული არ არის. შესაბამისად, ეს საკითხი ამ ეტაპზე დღის წესრიგში არ დგას, თუმცა ამაზე მსჯელობა მიმდინარეობს", - განუცხადა დარჩიაშვილმა „ჯი-ეიჩ-ენს", „ვიკილიქსის" მიერ გამოქვეყნებულ მასალებზე კომენტირებისას.
დეპუტატის განმარტებით, მიუხედავად საკითხზე მუშაობისა, რომელიმე ორგანიზაციის მხრიდან კატეგორიული მოთხოვნა, რომ „დღეს მივიღოთ ან ხვალ მივიღოთ გადაწყვეტილება", არ ყოფილა.
„რეგიონალური ენის საკითხზე მსჯელობა იყო რამდენიმე თვის წინ საგარეო ურთიერთობათა კომიტეტშიც და მასში მეც ვმონაწილეობდი, ანუ საკითხი შესწავლის პროცესშია და ეს პროცესი გაგრძელდება. წლის ბოლოს შეიძლება რაღაც დასკვნები დაიდოს, თუმცა იქედან გამომდინარე, რომ თემა არის რთული, ის ბევრ მუშაობას და კამათს მოითხოვს იმასთან დაკავშირებით, თუ რას ნიშნავს რეგიონალური ენა, რომელ რეგიონებს უნდა ეხებოდეს ის, როგორი დეფინიცია გავაკეთოთ...", - აღნიშნა დეპუტატმა.
შეგახსენებთ, რომ „ვიკილიქსის" მასალების მიხედვით, საქართველოში აშშ-ის ელჩი ჯონ ტეფტი ვაშინგტონისთვის 2008 წლის 29 სექტემბერს მიწერილ ტელეგრამაში „სამართლიანად და კანონიერად" მიიჩნევდა ეთნიკური სომხების მიერ საქართველოში სომხური ენის რეგიონალურ ენად გამოცხადების შესახებ.
