სირიის გარდამავალმა ხელისუფლებამ, დროებითი ლიდერის, აჰმედ ალ-შარაას ხელმძღვანელობით, ასადის რეჟიმის დამხობის შემდეგ, 5 ოქტომბერს დანიშნა ერთპალატიანი პარლამენტის, სახალხო საბჭოს პირველი არჩვნები. იტყობინება სირიის სახელმწიფო საინფორმაციო სააგენტო SANA.
გავრცელებული ინფორმაციით, პარლამენტის 210 წევრიდან 140-ის ასარჩევად ხმის მიცემა ქვეყნის ყველა საარჩევნო ოლქში ჩატარდება.
დარჩენილ 70 წევრს პრეზიდენტი ალ-შარაა დანიშნავს.
სააგენტო Reuters-ის ცნობით, ექსპერტები იმედოვნებენ, რომ სირიის ახალი პარლამენტი ქვეყანაში უფრო ფართო დემოკრატიულ პროცესებს ჩაუყრის საფუძველს, რადგან ამჟამინდელი სისტემა უმცირესობის საკმარის ჩართულობას არ ითვალისწინებს.
გარდამავალი პარლამენტი პასუხისმგებელი იქნება სირიის ახალი კანონმდებლობის შემუშავებასა და მუდმივი კონსტიტუციის შექმნაზე.
მარტში ალ-შარაამ ხელი მოაწერა გარდამავალი პერიოდის კონსტიტუციურ დეკლარაციას, რომლის თანახმად, დროებითი პარლამენტი თავდაპირველად სამწლიანი ვადით იმოქმედებს, რის შემდეგაც საკანონმდებლო ორგანოს ხელახლა არჩევა იქნება შესაძლებელი.
სახალხო საბჭოს ექნება სახელმწიფოს მეთაურის გადაყენების ან მისი უფლებამოსილების შეზღუდვის უფლებამოსილება, თუმცა თავდაპირველად პრეზიდენტი ერთპიროვნულად განახორციელებს აღმასრულებელ ხელისუფლებას.
ბაშარ ალ-ასადი სირიის პრეზიდენტის თანამდებობიდან გადადგა და ქვეყნიდან გაიქცა მას შემდეგ, რაც შეიარაღებული ოპოზიციური ძალები დამასკში 2024 წლის 8 დეკემბერს, 14-წლიანი სამოქალაქო ომის შემდეგ შევიდნენ.
