აჭარის მთავრობაში მორიგი საკადრო ცვლილებები განხორციელდა. აჭარის მთავრობის ინფორმაციით, ცვლილება შეეხო აჭარის ავტონომიური რესპუბლიკის ყველა სამინისტროსა და მის დაქვემდებარებაში არსებულ დეპარტამენტებს. ასევე, ქობულეთისა და ხელვაჩაურის მუნიციპალიტეტებსაც:
აჭარის ჯანმრთელობისა და სოციალური დაცვის მინისტრის მოადგილედ ფირან კალანდაძე დაინიშნა. იგი ბოლო პერიოდში თბილისის სამედიცინო უნივერსიტეტის უროლოგიის დეპარტამენტსა და ღუდუშაურის ეროვნულ სამედიცინო ცენტრში მუშაობდა.
ფინანსთა და ეკონომიკის მინისტრის მოადგილედ დაინიშნა თემურ გაბაიძე, რომელიც განათლების, კულტურისა და სპორტის სამინისტროში რესურსების მართვის დეპარტამენტის უფროსი იყო.
სოფლის მეურნეობის მინისტრის მოადგილედ გადავიდა აჭარის გარემოს დაცვისა და ბუნებრივი რესურსების სამმართველოს უკვე ყოფილი უფროსი, ირაკლი მოდებაძე. მისი თანამდებობა აჭარის ფინანსთა და ეკონომიკის სამინისტროს იურიდიული დეპატრამენტის უფროსმა ოლეგ ბოლქვაძემ დაიკავა. ამავე სამმართველოს უფროსის მოადგილედ დაინიშნა კობა ზაქარაია, რომელიც აჭარის მთავრობის აპარატის ადმინისტრაციულ ორგანოებთან ურთიერთობის დეპარტამენტს ხელმძღვანელობდა. აღნიშნულ დეპარტამენტს კი, ქობულეთის ყოფილი გამგებელი ასლან ყურშუბაძე ჩაუდგება სათავეში.
ხოლო, ქობულეთის გამგებელი საკრებულოს გადაწყვეტილებით აჭარის უმაღლესი საბჭოს წევრი, საფინანსო–საბიუჯეტო კომისიის თავმჯდომარე გელა ცხომელიძე გახდა. მისი მოადგილე კი, სპორტისა და ახლაგაზრდულ საქმეთა დეპარტამენტის უფროსი რევაზ ხარაზია.
ცვლილება შეეხო ხელვაჩაურსაც. გარემოს დაცვისა და ბუნებრივი რეუსრსების სამმართველოდან ლეონ თედორაძე გამგებლის მოადგილედ გადავიდა.
მასალის გამოყენების პირობები
