ბელგრადში სერბი სტუდენტების მოძრაობის მიერ ორგანიზებული მასშტაბური წინასაარჩევნო აქცია იმართება, სახელწოდებით - „გამარჯვება გვიხმობს“. სტუდენტებისა და მათი მხარდამჭერების ათასობით წარმომადგენელი სერბეთის სხვადასხვა ქალაქიდან დედაქალაქში ჩავიდა, მათმა ნაწილმა კი ბელგრადამდე მისასვლელად რამდენიმე დღე ფეხით იარა.
მედიის ცნობით, აქცია საპარლამენტო არჩევნების წინ სტუდენტური მოძრაობის საარჩევნო კამპანიის დასკვნითი ღონისძიებაა. ვადამდელი საპარლამენტო არჩევნები სერბეთში 25 ოქტომბერს უნდა გაიმართოს. საპარლამენტო არჩევნებში სტუდენტები საკუთარი კანდიდატებით იღებენ მონაწილეობას და ალექსანდრ ვუჩიჩის მმართველ პარტიას უპირისპირდებიან.
აქციის მონაწილეებმა დედაქალაქის ცენტრალურ სლავიას მოედანზე მოიყარეს თავი. Associated Press-ის ცნობით, შეკრებას ასობით ათასი ადამიანი ესწრება, ხოლო მოედნის მიმდებარე ქუჩებიც ხალხით გაივსო. მონაწილეები სერბეთის დროშებს აფრიალებდნენ და სკანდირებენ: „გამარჯვება“.
სტუდენტური მოძრაობის პროტესტი 2024 წლის ნოემბერში, ნოვი-სადში რკინიგზის სადგურის სახურავის ჩამონგრევის შემდეგ დაიწყო. შემთხვევას 16 ადამიანი ემსხვერპლა. სტუდენტები მომხდარზე პასუხისმგებლობის დაკისრებასა და კორუფციის წინააღმდეგ ბრძოლას მოითხოვდნენ, მოგვიანებით კი მათი პროტესტი პრეზიდენტ ალექსანდარ ვუჩიჩის ხელისუფლების წინააღმდეგ ფართო მოძრაობად გადაიქცა.
