შ.პ.ს. "ევრაზიანსთილსის" ქუთაისის მეტალურგიული ქარხანა "ჰერკულესის" თანამშრომლები 2 სექტემბერს, 13:00 საათიდან, ორსაათიან გამაფრთხილებელ გაფიცვას მოაწყობენ. ეს გადაწყვეტილება მუშებმა საწარმოში არსებული პირობების გამო მიიღეს.
აღნიშნულის შესახებ წერილობითი გაფრთხილება დღეს დილით გაეგზავნათ შ.პ.ს. "ევრაზიანსთილსის" დირექტორთა საბჭოს თავმჯდომარე პაატა ჩხენკელს, შ.პ.ს. "ევრაზიანსთილსის" ქუთაისის მეტალურგიული ქარხანა "ჰერკულესის" მენეჯერ რაჯი კუმარ სურეკას, საქართველოს სოციალური პარტნიორობის სამმხრივი კომისიის თავმჯდომარეს, საქართველოს შრომის, ჯანმრთელობისა და სოციალური დაცვის მინისტრ ანდრია ურუშაძეს, სოციალურ პარტნიორებს, საქართველოს სახალხო დამცველ გიორგი ტუღუშს.
გაფიცვას უხელმძღვანელებენ შ.პ.ს. "ევრაზიანსთილსის" ქუთაისის მეტალურგიული ქარხანა "ჰერკულესის" პირველადი პროფკავშირული ორგანიზაციისა და საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირის წარმოადგენლები.
