„ქართული პარტია" თბილისში სამარშრუტო ტაქსებით მგზავრობის მორიგ გაძვირებას აპროტესტებს. 26 აგვისტოდან ტარიფმა 80 თეთრამდე იმ მოკლე მანძილის ხაზებზეც მოიმატა, რომელიც აქამდე 60 თეთრამდე იყო გაძვირებული.
როგორც დღეს გამართულ ბრიფინგზე „ქართული პარტიის" პოლიტიკური საბჭოს წევრმა სოფიო ხორგუანმა განაცხადა, მძღოლები კვლავ იძულებაზე საუბრობენ. ფასის ზრდა არც მათთვის და, ცხადია, არც მგზავრებისთვის არის ხელსაყრელი.
„ქართულმა პარტიამ" მძღოლებზე ზეწოლის ფაქტების გამო, ჯერ კიდევ, 22 ივლისს ოფიციალურად მიმართა შს სამინისტროსა და მთავარ პროკურატურას დაედგინათ, ვინ იყვნენ ის ადამიანები, ვინც მუქარით, შანტაჟით თუ სხვა ფორმებით ცდილობდნენ მძღოლების იძულებას გაეზარდათ მგზავრობის გადასახადი.
სოფიო ხორგუანის თქმით, აღნიშნული უწყებებისგან პასუხი ამ დრომდე არ მიუღიათ. „ქართული პარტიის" ერთ-ერთ ლიდერს იმედი აქვს, რომ შს სამინისტრო და მთავარი პროკურატურა ახლა მაინც გამოეხმაურება მათ მოთხოვნას და განმარტებას გააკეთებს, მიმდინარეობს თუ არა აღნიშნულ საქმეზე გამოძიება.
