"ბიუჯეტი შემოსულობების ხარჯზე გაიზარდა და მთლიანობაში 643 მლნ. 818 ათას ლარს შეადგენს", - განაცხადა თბილისის მერიის საფინანსო სამსახურის უფროსის მოადგილემ პაატა გობეჯიშვილმა.

სხდომაზე ოპოზიციის წარმომადგენლების თქმით, ბიუჯეტის პროექტის რამდენიმე სეგმენტი სწორად არ არის გათვლილი.

როგორც საკრებულოს საფინანსო-საბიუჯეტო კომისიის თავჯდომარემ, თამაზ შოშიაშვილმა სხდომაზე განაცხადა, ბიუჯეტის გაზრდასთან ერთად გაიზარდა გადასახადებიც.

"სოციალური დაცვის პროგრამა 1 მლნ. 200 ათასი ლარით გაიზარდა. შსს თბილისის სამმართველოსთვის 500 ათასი, ხოლო კუვეიტის ფონდიდან აღებული სესხისთვის 2 მლნ, 800 ათასი ლარი გამოიყო. ავარიულ შენობებსა და სხვა ნაგებობებს 3 მლნ. 100 ათასი ლარი დაემატა, ხოლო გუდაურის განვითარების ფონდი 1 მლნ. 500 ათასილარით დაფინანსდება. მოგეხსენებათ, ცალკე მხარჯავ დაწესებულებად გამოიყო ქალაქ თბილისის მერიის სასწრაფო-სამედიცინო დახმარების ცენტრი, რომლის ასიგნებებიც 3 მლნ. 500 ათას ლარს წარმოადგენდა და მას 1 მლნ. ლარი დაემატა. რაც ყველაზე მნიშვნელოვანია ბიუჯეტში გათვალისწინებულია თანხები სხვადასხვა კეთილმოწყობის ღონისძიებებისთვის, რომელიც გაზიფიცირების პირველ ეტაპს მოიცავს და იგი 2 მლნ. ლარს შეადგენს. აღსანიშნავია, რომ ამ პროგრამისთვის თანხა გზის საფარის აღდგენითი სამუშაოების ეკონომიის ხარჯზე გამოიყო", - განაცხადა შოშიაშვილმა.

შეგახსენებთ, რომ სხდომაზე საკრებულოს წარმომადგენლებმა დღის წესრიგით გათვალისწინებულ 9 საკითხი განიხილეს.