"როსპოტრებნადზორი" რუსეთში ქართული მინერალური წყლის "ბორჯომის", მიწოდების აღდგენის საკითხს განიხილავს. უწყებაში შესულია განაცხადი რუსეთის ფედერაციაში "ბორჯომის" შეტანის შესახებ, თუმცა ქართულ მხარეს განცხადების შტანის შესახებ ინფორმაცია არ გაუვრცელებია.
"მომხმარებელთა უფლებების დაცვისა და ადამიანის კეთილდღეობის ფედერალურ სამსახურში შესულია ოფიციალური განაცხადი რუსეთის ფედერაციაში „ბორჯომის" შეტანის შესახებ, რომელიც ამჟამად განიხილება", - იტყობინება როსპოტრებნადზორი.
რამდენიმე დღის წინ რუსეთის მთავარმა სანიტარულმა ექიმმა გენადი ონიშენკომ განაცხადა, რომ ქართული ღვინო და მინერალური წყალი რუსულ ბაზარზე დაბრუნებას შეძლებენ თუ გაივლიან ყველა აუცილებელ პროცედურას და იქნება პროდუქციის უსაფრთხოების გარანტიები.
შეგახსენებთ, რომ 2006 წელს რუსეთმა სანიტარული ნორმების დაღვევის საბაბით რუსულ ბაზარზე ქართული ალკოჰოლური პროდუქციისა და მინერალური წყლის შეტანა აკრძალა.
სტატისტიკის დეპარტამენტის მონაცემებით, 2006 წლამდე საქართველოდან რუსეთში ღვინის ექსპორტის მოცულობა სულ უფრო იზრდებოდა.
2005 წელს ღვინის ექსპორტის საერთო მოცულობამ 63 მილიონი აშშ დოლარი შეადგინა, რაც 27 მილიონი აშშ დოლარით მეტი იყო 2004 წლის ანალოგიურ მაჩვენებელთან და 31 მილიონით მეტი 2003 წლის მაჩვენებელთან შედარებით. 2006 წლის იანვარ-თებერვალში კი ღვინის ექსპორტმა რუსეთში 8,6 მილიონ აშშ დოლარს გადააჭარბა.
