"ქრისტიან-დემოკრატების" ლიდერი რეგიონებში შეხვედრებს განაგრძობს. გიორგი თარგამაძე დღეს ოზურგეთის რაიონის სოფელ თხინვალის მოსახლეობას შეხვდა. სოფლის ცენტრში შეხვედრის შემდეგ საპარლამენტო უმცირესობის ლიდერი მშენებარე ეკლესიასთან მრევლს გაესაუბრა. "ქრისტიან-დემოკრატებმა" ტაძარს საჩუქრად მაცხოვრის ხატი გადასცეს, ბავშვებს კი ბურთები და სპორტული ინვენტარი დაურიგეს.
"ამ შეხვედრის შემდეგ კიდევ ერთხელ დავრწმუნდით, რომ რეგიონული ინფრასტრუქტურის განვითარების პრიორიტეტებში გურია ერთ-ერთი ყველაზე დაჩაგრული რეგიონია.
სახელმწიფოსთან ერთად, სამწუხაროდ, პასიურ როლს თამაშობს ბიზნესიც. ჩვენ აუცილებლად მიგვაჩნია ამგვარი დამოკიდებულების დიამეტრალურად შეცვლა და არც თუ შორეულ წარსულში ერთ-ერთი წარმატებული კუთხისთვის პერსპექტივის გაჩენა. უმოკლეს დროში უნდა მოხდეს სოფლის გზების მოწესრიგება, ასევე უნდა შემუშავდეს მცირე და საშუალო ბიზნესისთვის ხელშეწყობის სტრატეგია. ამ მიმართულებით ჩვენს პარტიას, სპეციალისტებთან ერთად, შემუშავებული აქვს ხედვა, რის დროულად გათვალისწინებასაც მთავრობას კიდევ ერთხელ ვურჩევთ", - განაცხადა გიორგი თარგამაძემ.
