მეფუტკრეების თქმით, წელს თაფლის უხვ მოსავალს ელოდებოდნენ, მაგრამ ყვავილობისას ხშირი ნალექების გამო ფუტკარი საკვების მოსაპოვებლად ვერ გამოდიოდა. შემდეგ კი ცხელი ამინდები დადგა. მაღალ ტემპერატურაზე ყვავილი მოიშუშა და ერთი სკიდან 8 კილოგრამი თაფლი მიიღეს. ვინც დამატებით საკვები მისცა ფუტკარს, სკიდან საშუალო მოსავლიანობამ 20-25 კილოგრამი შეადგინა.

მეფუტკრეობას ყველაზე მეტად ყვარელში, ახალსოფელსა და მთისძირში მისდევენ. სოფელ მთისძირში 342 კომლია. მოსახლეობის 95% მეფუტკრეობას მისდევს. ყვარელში 3 000 კომლია. დაახლოებით 600 ოჯახი მეფუტკრეობას მისდევს, მათგან 200 მეფუტკრე თაფლის ბიზნესს ეწევა. „პატარა ბიჭებიც კი მეფუტკრეობას იწყებენ", - აღნიშნა ყვარლის ტერიტორიული ორგანოს რწმუნებულმა ლევან კოკორაშვილმა.

ახალსოფლის ტერიტორიული ორგანოს რწმუნებულის სიმონ ტივიშვილის ინფორმაციით, ახალსოფელში 130 მეფუტკრეა. „შარშან 150 მეფუტკრე იყო, მაგრამ წელს დაავადებამ ზოგს ფუტკრის ოჯახები გაუნადგურა. თითოეულ მეფუტკრეს 15-დან 120 სკამდე ფუტკარი ჰყავს", - აღნიშნა ტივიშვილმა.

ფუტკარი თაფლის გარდა იძლევა ცვილს, სანთელს, ყვავილის მტვერს, დინდგელს. 1 კილოგრამი ცვილის ანუ სანთლის ფასი - 20-25 ლარია, 1 კილოგრამი დინდგელი - 25 ლარი, 100 გრამი ყვავილის მტვერი კი 6 ლარი ღირს.