„ქართული პარტიის" პოლიტსაბჭოს წევრი სოფიო ხორგუანი თბილისის მერიას და განათლების და მეცნიერების სამინისტროს კანონით გათვალისწინებული ვალდებულებების იგნორირებაში ადანაშაულებს. მისი თქმით, „ქართული პარტია" ამ ორ უწყებას, კანონის მოთხოვნათა შეუსრულებლობისთვის, სასამართლოში უჩივლებს და ამ გზით შეეცდება მათგან საჯარო ინფორმაციის მიღებას.
„ჩვენ მივმართეთ დედაქალაქის მერიას, მოეწოდებინა საჯარო ინფორმაცია იმისა შესახებ, თუ რა ქონებას ეხება საქმე ბოტანიკური ბაღის მათთვის გადაცემის შემთხვევაში და მმართველობის რა ფორმით გადაეცა მას ეს ქონება. განათლების სამინისტროსგანაც ვითხოვდით საჯარო ინფორმაციას, თუ რა კრიტერიუმებით იხელმძღვანელა მან, როდესაც დაფინანსება შეუწყვიტა 6 სამეცნიერო ინსტიტუტს, მათ შორის ბოტანიკის ინსტიტუტს.სამწუხაროდ, არც ერთმა ამ უწყებამ პასუხი არ გაგვცა, საჯარო ინფორმაცია არ მოგვაწოდა და ამით კანონი დაარღვია. ამიტომ, „ქართული პარტია" შეეცდება, ეს ინფორმაცია სასამართლოს გზით მოიპოვოს", - განაცხადა სოფიო ხორგუანმა 15 აგვისტოს გამართულ პრესკონფერენციაზე.
