"სურსათის ეროვნული სააგენტო" სამცხე-ჯავახეთის რეგიონში დაავადება თურქულის საწინააღმდეგო პროფილაქტიკურ ვაქცინაციას ახორციელებს. სააგენტოს ინფორმაციით, წვრილფეხა პირუტყვის აცრა წალკის, ნინოწმინდისა და ბორჯომის ზაფხულის საძოვრებზე მიმდინარეობს. იმუნიზაციის პროცესს გუჯარეთის ხეობაში სააგენტოს უფროსი დავით კობერიძე და მოადგილე ზურაბ ბეჯანიშვილი დაესწრნენ.
"ეპიზოოტიის საწინააღმდეგო სახელმწიფო მიზნობრივი პროგრამის" ფარგლებში სამცხე-ჯავახეთის რეგიონში დაგეგმილია 25 ათასი სული ცხვრის ვაქცინაცია. აღსანიშნავია ის გარემოება, რომ იმუნიზაციის პარალელურად პირველად ხორციელდება საქონლის იდენტიფიკაცია, რომელიც მნიშვნელოვნად შეუწყობს ხელს ექსპორტის პოტენციალის გაზრდას.
უწყებაში განმარტავენ, რომ მიუხედავად იმისა, რომ თურქული ადამიანის ჯანმრთელობისთვის საშიში არ არის, იგი ცხოველთა მწვავე ინფექციური დაავადებაა, რომელიც, ზოგიერთ შემთხვევაში, იწვევს ცხოველის დაცემას და, ამავე დროს, დაკავშირებულია ეკონომიკურ ზარალთან მეცხოველეობის დარგში.
