საქართველო-აზერბაიჯანის საზღვრის დელიმიტაციის საკითხზე მომუშავე ქართულ-აზერბაიჯანული ჯგუფის შეხვედრა ოქტომბერში თბილისში გაიმართება. ამის შესახებ ინფორმაციას აზერბაიჯანული სააგენტო "სალამნიუსი" აზერბაიჯანის მიწისა და კარტოგრაფიის სახელმწიფო კომიტეტის აპარატის ხელმძღვანელზე, ადალიათ სალმანოვზე დაყრდნობით ავრცელებს.
სალმანოვის განცხადებით, შეისწავლიან კარტოგრაფიასთან, ტყესთან, მეურნეობასთან და სხვა საკითხებთან დაკავშირებულ დოკუმენტებს. ჯგუფის წევრები გაზომავენ საზღვრებს ცალკეულ ადგილებზე და ჩაატარებენ სხვა გეოდეზიულ სამუშაოს.
შეგახსენებთ, რომ საქართველოს სასაზღვრო პოლიციის მონაცემებით, საქართველოს სახელმწიფო საზღვრების საერთო სიგრძე 2148 კილომეტრია. აქედან, 446 კილომეტრია აზერბაიჯანთან. საქართველო-აზერბაიჯანის საზღვრების სადელიმიტაციო ორმხრივი სამთავრობოთაშორისო კომისია 1993 წლიდან მუშაობს. ამ ხნის განმავლობაში საზღვრის დაახლოებით 65% (300 კმ) დაზუსტდა, თუმცა საზღვარი დადგენილი ამ დრომდე არ არის. აზერბაიჯანის საგარეო საქმეთა სამინისტროს ოფიციალური ინფორმაციით, საქართველო-აზერბაიჯანის საზღვრის დადგენას დავით გარეჯა აფერხებს. აზერბაიჯანის მიწისა და კარტოგრაფიის სახელმწიფო კომიტეტის თავმჯდომარემ გარიბ მამედოვმა განაცხადა, რომ საქართველოსა და აზერბაიჯანის საზღვარზე - კეშიკჩის გორაზე განლაგებული მონასტერი ალბანური წარმოშობისაა.
