"ჩვენ არასოდეს დაგვავიწყდება ქართული არმიის ვერაგული თავდასხმა ჩვენს მშვიდობიან რესპუბლიკაზე. ჩვენ ყველას კარგად გვახოვს ის სიმწარე, რომლის გადატანამაც ჩვენ მოგვიწია აგვისტოს რამდენიმე დღის განმავლობაში - ჩვენი დამწვარი სოფლები და დედაქალაქი, ჩვენი დედებისა და დების ცრემლები, ჩვენი გარდაცვლილი მეგობრები და ახლობლები", _ აცხადებს ოს სეპარატისტთა ლიდერი ედუარდ კოკოითი ე.წ. სამხრეთ ოსეთის ბეჭდვისა და ინფორმაციის კომიტეტისათვის მიცემულ ინტერვიუში 2008 წლის აგვისტოს რუსეთ-საქართველოს ომიდან სამი წლის შემდეგ.
"ჩვენ არასოდეს დაგვავიწყდება მტრის ვერაგობა, რომელიც ყოველგვარი სინდისის გარეშე თავდასხმამდე რამდენიმე საათით ადრე მშიდობაზე საუბრობდა და რამდენიმე საათის შემდეგ კი გააკეთა ყველაფერი იმისათვის რათა ჩვენი ხალხი და სახელმწიფო გაენადგურებინა", _ აცხადებს კოკოითი და აღნიშნავს, რომ რომ არა რუსეთი ე.წ. სამხრეთ ოსეთი მაშინ ვერ გადარჩებოდა.
"უკიდეგანოა ჩვენი მადლიერება რუსეთის მიმართ. როდესაც ჩვენ 58-ე არმიის პირველი ნაწილები დავინახეთ მივხვდით, რომ აგრესორის გეგმები ჩავარდა. ეს გრძნობა სამუსამოდ დარჩება ოსი ხალხის მეხსიერებაში", _ აცხადებს კოკოითი და აღნიშნავს, რომ ამასთან ერთად 2008 წლის აგვისტო ეს არის "ჩვენი ხალხის მრავალწლიანი ბრძოლის დასრულება თავისუფლებისა და დამოუკიდებლობისათვის".
თუმცა, მიუხედავად ამისა, ოს სეპარატისტთა ლიდერი ასევე აცხადებს, რომ მათ, კარგად ესმით თუ რა ვერაგი მეზობელი ჰყავთ და ამიტომაც ისინი სიტუაციის ყოველგვარ განვითარებას ადევნებენ თვალს.
"საქართველომ აღადგინა თავისი სამხედრო პოტენციალი და იგი დღეს მაშინდელზე გაცილებით მაღალია. ამას გარდა, საქართველო აკეთებს ყველაფერს იმისათვის, რომ თავის დასავლელ პარტნიორებს აამოს და თუ მას ჩაუვარდება შესაძლებლობა იგი აუცილებლად შეეცდება რევანში აიღოს 2008 წლის აგვისტოზე", _ აცხადებს კოკოითი და აღნიშნავს, რომ ამიტომაც სეპარატისტები თავიანთი ე.წ. უსაფრთხოების დასაცავად ყოველთვის სრულ მზადტოფნაში არიან.
მისივე თქმით, მართალია მათი ე.წ. შეიარაღებული ძალები რაოდენობრივად შემცირდა, მაგრამ ისინი რეგულარულ მომზადებას გადიან იმისათვის რათა კარგად აღჭურვილ და მობილურ ჯარად იქცნენ.
ამას გარდა, ოს სეპარატისტთა ლიდერი ასევე აცხადებს, იმ შემთხვევაში თუ რეგიონში დაძაბულობა კვლავ გაიზრდება რუსული სამხედრო ძალა, რომელიც ამჟამად ცხინვალის რეგიონში დგას რუსეთიდან შემოსული სამხედროებით შეივსება.
ხოლო, რაც შეეხება საქართველოსთან ურთიერთობებს მომავალში ოს სეპარატისტთა ლიდერი მათ მხოლოდ ოს თანასწორუფლებიან და კეთილმეზობლურ სახელმწფოებს შორის ხედავს.
"თანასწორუფლებიანობისა და კეთილმეზობლობის გარდა სხვა ვარიანტი გამორიცხულია. მიუხევად არაერთი აგრესიისა ოსი ხალხი ყველა ქართველზე გაბრაზებული არ არის. ჩვენ გვესმის, რომ ქართველი ხალხი ნაციონალისტური და ავანტიურისტული რეჟიმის ტყვეობაში აღმოჩნდა და მხოლოდ მათზეა დამოკიდებული თუ რამდენად მალე შეძლებენ ისინი ამ ლოდისგან გათავისუფლებას", _ აცხადებს ოს სეპარატისტთა ლიდერი.
