რეინტეგრაციის საკითხებში სახელმწიფო მინისტრ ეკა ტყეშელაშვილის შეფასებით, რუსეთისა და აფხაზეთის ურთიერთობები ბლეფია.
"ეს ყველაფერი იურიდიული თვალსაზრისით ბლეფია. რუსეთი არის ოკუპანტი სახელმწიფო და რაღაც ვირტუალური სამყაროს შექმნით ცდილობს აფხაზეთთან, როგორც "დამოუკიდებელ რესპუბლიკასთან" ურთიერთობის წარმოჩენას", - განუცხადა ტყეშელაშვილმა ჟურნალისტებს მთავრობის დღევანდელი სხდომის დაწყების წინ.
ამასთან, სახელმწიფო მინისტრმა კომენტარი გააკეთა ცხინვალში მოსალოდნელი რეფერენდუმის თაობაზეც და აღნიშნა, რომ ის, რაც ამ რეგიონში ხდება, ისე როგორც აფხაზეთში, არის არალეგიტიმური.
"ნებისმიერი რამე, რასაც შესაძლოა ადგილი ჰქონდეს ოკუპირებულ ტერიტორიებზე, არის ნული იურიდიული ძალის მქონე, ვიდრე დეოკუპაცია არ მოხდება და სამართლიანობა არ აღდგება", - აღნიშნა სახელმწიფო მინისტრმა.
