ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო ქუთაისიდან დევნილების შესაძლო გამოსახლების ფაქტს უარყოფს.
სამინისტროს პრესისა და ინფორმაციის დეპარტამენტის ხელმძღვანლის ეკა გულუას განცხადებით, დევნილთა გამოსახლება არ იგეგმება.
"გავრცელებული ინფორმაცია სიმართლეს არ შეესაბამება, არის ტყუილი. დევნილების გამოსახლება არ იგეგმება, პირიქით დევნილებისათვის საცხოვრებელი ფართების დაკანონების პროცესი აქტიურ ფაზაში შედის", - განუცხადა "ჯი-ეიჩ-ენს" გულუამ
შეგახსენებთ, რომ დღეს პარტია „თავისუფალი საქართველომ" გაავრცელა ინფორმაცია, რომ დევნილთა გამოსახლების მორიგი ეტაპი ქუთაისში იგეგმება. პარტიის ინფორმაციით პირველი წყალწითელას პანსიონში კომპაქტურად ჩასახლებულ დევნილებს გამოასახლებენ.
„თავისუფალი საქართველოში" განმარტავენ, რომ აღნიშნულთან დაკავშირებით შეშფოთებულია ქუთაისში სხვადასხვა დასახლებებში მცხოვრები დევნილი მოსახლეობა.
