საქართველოს სახალხო დამცველმა პარლამენტს საკანონმდებლო წინადადებით მიმართა. როგორც „ჯი-ეიჩ-ენს" სახალხო დამცვბელის ოფისიდან აცნობეს, სახალხო დამცველმა გიორგი ტუღუშმა საკანონმდებლო წინადადებით მიმართა საქართველოს პარლამენტს, რათა მოხდეს სისხლის სამართლის კოდექსის 314-ე მუხლის პირველი ნაწილის იმგვარი ფორმულირება, რომ გამოირიცხოს ნორმის კონსტიტუციის საწინააღმდეგო განმარტების შესაძლებლობა.
„სახალხო დამცველის მიერ შესწავლილი იქნა სისხლის სამართლის კოდექსის 314-ე მუხლის შესაბამისობა საქართველოს კონსტიტუციის მე-2 თავით აღიარებულ ადამიანის უფლებებთან და საერთაშორისო სტანდარტებთან. საკითხის შესწავლას საფუძვლად დაედო საქართველოს მოქალაქეთა ჯგუფის (ლაშა ტუღუში, სანდრო ბარამიძე, ვახტანგ ხმალაძე) მიერ ნორმის არაკონსტიტუციურობასთან დაკავშირებით საჯარო სივრცეში გამოთქმული მოსაზრებები. საკითხის შესწავლის შემდეგ სახალხო დამცველს მიაჩნია, რომ აღნიშნული მუხლის პირველი ნაწილის არსებული რედაქცია შესაბამისობაში არ მოდის კონსტიტუციით დაცულ უფლებებთან", - ნათქვამია განცხადებაში.
ომბუდსმენი განმარტავს, რომ სადავო დებულება - "აგრეთვე საქართველოს ინტერესის საზიანოდ უცხო ქვეყნის დაზვერვის ან უცხოეთის ორგანიზაციის დავალებით სხვა ინფორმაციის შეგროვება ან გადაცემა" არ აკონკრეტებს, თუ რა სახის "სხვა ინფორმაციის" შეგროვებას ან გადაცემას კრძალავს კანონი.
„სრულიად არამიზანშეწონილია დემოკრატიულ საზოგადოებაში პირის სისხლისსამართლებრივი წესით დასჯა ისეთი "სხვა ინფორმაციის" მოპოვება-გავრცელებისთვის, რომელიც, საიდუმლო ინფორმაციისაგან განსხვავებით, არ შეიცავს მონაცემებს თავდაცვის, ეკონომიკის, საგარეო ურთიერთობის, დაზვერვის, სახელმწიფო უსაფრთხოების და მართლწესრიგის დაცვის სფეროებში, რომელთა გამჟღავნებას ან დაკარგვას შეუძლია ზიანი მიაყენოს საქართველოს ან საერთაშორისო ხელშეკრულებებისა და შეთანხმებების მონაწილე მხარის სუვერენიტეტს, კონსტიტუციურ წყობილებას, პოლიტიკურ და ეკონომიკურ ინტერესებს", - აღნიშნულია ტუღუშის განცხადებაში.
ამასთან, საქართველოს სახალხო დამცველს მიაჩნია, რომ რომ მნიშვნელოვანია საქართველოს პარლამენტმა განსაკუთრებული ყურადღება დაუთმოს სახალხო დამცველის მიერ გამოგზავნილ საკანონმდებლო წინადადებას.
