„ქართული პარტიის" ახალგაზრდული ორგანიზაციის თავმჯდომარის ლერი ლაფაჩის ინფორმაციით, ბოლო პერიოდში ზოგიერთი ოპოზიციური პარტიის ლიდერი აქტიურად ცდილობს მისი თანაგუნდელების გადაბირებას.
ლაფაჩის განცხადებით, ცალკეული ოპოზიციონერი პოლიტიკოსები ხვდებიან „ქართული პარტიის" ახალგაზრდული ფრთის წარმომადგენლებს და მათ პოლიტიკური გუნდის შეცვლას ურჩევენ - „ქართული პარტიის" რიგების დატოვებას და მათთან გაწევრიანებას სთავაზობენ.
"ამასთან, ისინი მოუწოდებენ „ქართული პარტიის" ახალგაზრდული ორგანიზაციის წარმომადგენლებს, თანაპარტიელებს გაემიჯნონ ხმამაღალი განცხადებებით, რომლითაც ისინი დაგმობენ „ქართული პარტიის" საქმიანობას და პარტიის თანათავმჯდომარის ირაკლი ოქრუაშვილის პოზიციას", - აცხადებს ლაფაჩი.
მისივე შეფასებით, ეს არის უზნეო, არაეთიკური საქციელი.
„ქართული პარტიის" ახალგაზრდული ორგანიზაციის თავმჯდომარე მოუწოდებს ოპოზიციურ ძალებს, თავი შეიკავონ პოლიტიკური პროზელიტიზმისგან.
