საპარლამენტო ფრაქცია "ერთობა სამართლიანობისთვის" პარლამენტში ეკონომიკისა და მდგრადი განვითარების მინისტრს ვერა ქობალიას იბარებს. ამის შესახებ დღეს, გამართულ პრესკონფერენციაზე ფრაქციის თავმჯდომარემ გიორგი ცაგარეიშვილმა განაცხადა.
"ეკონომიკის სამინისტრომ აბსოლუტურად შეგნებულად საქართველოს ტელე-რადიო ცენტს "ალფაკომი" მხოლოდ იმიტომ დაარქვა, რომ მოსახლება შეცდომაში შეეყვანა და მისი გასხვისება მოეხდინა", - აღნიშნა ცაგარეიშვილმა და აქვე დასძინა, რომ ხელისუფლება არ ელოდებოდა ჟურნალისტებისა და პოლიტიკოსების მხრიდან ანძის გასხვისებაზე ასეთ რეაქციას.
მისივე თქმით, ელექტრონული აუქციონის გამოცხადებისთანავე ანძის მართვის უფლების მიღებაზე მხოლოდ ერთმა კომპანიამ გამოხატა სურვილი, რომლის უკანაც, დეპუტატი დარწმუნებულია, რომ ხელისუფლების გუნდის წარმომადგენლები დგანან.
"დღეს დავუკავშირდი მთავრობის საპარლამენტო მდივნის მოადგილეს ხათუნა კაპანაძეს და ვთხოვე დღესვე აცნობოს ეკონომიკისა და მდგრადი განვითარების მინისტრს ვერა ქობალიას, რომ 1-ელ აგვისტოს ფრაქციის სხდომაზეა დაბარებული, სადაც ანძის გასხვისების საკითხზე საჯარო განხილვა მოეწყობა", - აღნიშნა გიორგი ცაგარეიშვილმა.
ამასთან, ახალი საპარლამენტო ფრაქციის თავმჯდომარემ ეკონომიკის მინისტრს მოუწოდა, იმ შემთხვევაში თუ თავად ვერ მოახერხებს პარლამენტში მისვლას მოადგილე ან აღნიშნულ საკითხზე პასუხისმგებელი პირი გამოგზავნოს და არა დარაჯი ან დამლაგებელი.
მისივე თქმით, ფრაქცია "ერთობა სამართლიანობისთვის" სხდომა ანძის გასხვისების საკითხზე 1-ელ აგვისტოს, 12:00 საათზე პარლამენტში გაიმართება.
