"საერთაშორისო საწარმოთა ფუნქციონირების და საინვესტიციო პროექტების განხორციელების ხელშეწყობის მიზნით სამთავრობო საბჭო შეიქმნა. საქართველოს მთავრობის დადგენილების თანახმად, საბჭოს შემადგენლობას პრემიერ-მინისტრი დააკომპლექტებს.
საბჭოს მიზანია, საერთაშორისო საწარმოსათვის საერთაშორისო საწარმოს სტატუსის გაუქმების გარეშე, საქართველოს კანონმდებლობით შეზღუდული საქმიანობის უფლების მიცემასთან დაკავშირებული საკითხების განხილვა.
იმისთვის, რომ საბჭომ გადაწყვეტილება მიიღოს, აუცილებელია, სხდომაზე დამსწრე წევრთა უმრავლესობის თანხმობა, მაგრამ იმ შემთხვევაში თუ ხმები თანაბრად გაიყო გადამწყვეტი ხმის უფლებით საბჭოს თავმჯდომარე სარგებლობს.
შეგახსენებთ, რომ პარლამენტის მიერ "საგადასახადო კოდექსში" შეტანილი ცვლილებების თანახმად, საქართველოს მთავრობას უფლებამოსილება მიენიჭა საერთაშორისო საწარმოს კანონმდებლობით შეზღუდული საქმიანობის უფლება მისცეს, ასევე, დააწესოს ტარიფი და განსაზღვროს მისი ოდენობა.
