კომპანია "თბილისის მიკროავტუბუსის" განცხადებით, სამარშრუტო ტაქსებით მგზავრობის საფასურის გაზრდა სისტემის ლეგალურ დაბეგვრის რეჟიმში მოქცევამ განაპირობა. კომპანიის გენერალური დირექტორმა დავით ასანიძემ საკრებულოს დეპუტატის ჯაბა სამუშიას ბრალდებას უპასუხა და განაცხადა, რომ ფასის მატება კომპანიის პრეროგატივა არ ყოფილა.
"გაძვირების ერთ-ერთი მთავარი მიზეზია ამ სისტემის ლეგალური დაბეგვრის რეჟიმში მოქცევა, ანუ დღემდე მიკროავტობუსებში მგზავრობისათვის გადახდილი თანხა იყო ე.წ. ,,შავი ფული", დღეიდან კი ის საგადასახადო კოდექსის შესაბამისად იბეგრება. ასევე მნიშვნელოვანია ისიც, რომ მძღოლების ნაწილი ითხოვდა ძველ მიკროავტობუსებზე საფასურის გაზრდას და წარმოადგინეს ხელმოწერები. კომპანია მაქსიმალურად ცდილობდა არსებული ტარიფი შრეენარჩუნებინა, მაგრამ ახალი მიკროავტობუსების გამოჩენამ ახალი ტარიფით შესაძლებლობა მისცა მათ ძველ მიკროავტობუსებზეც გაეზარდათ საფასური და კომპანიამ ხელი არ შეუშალა. ფასები მხოლოდ 80 თეთრი არ იქნება, არამედ არის სამარშრუტო ხაზები, სადაც მგზავრობის ღირებულება შეადგენს 30, 40 , 50 და 60 თეთრს", - ნათქვამია ასანძისი განცხადებაში.
შეგახსენებთ, რომ საკრებულოს თავმჯდომარის მოადგილე ჯაბა სამუშიამ დღეს გამართულ ბრიფინგზე განაცხადა, რომ ტენდერის პირობების თანახმად, კომპანიებს მგზავრობის საფასურის გაზრდის შესახებ მერიისთვის ერთი თვით ადრე უნდა ეცნობებინათ. მსგავსი შეტყობინება კი, ჯაბა სამუშიას ინფორმაციით, თბილისის მერიაში არ შესულა. მისი თქმით, ეს არის კანონის დარღვევა, რაზეც მერიამ აუცილებლად უნდა მოახდინოს რეაგირება.
"ჯერ კიდევ 17 ივნისს "თბილისის მიკროავტობუსის" ხელმძღვანელი დავით ასანიძე პირობას დებდა, რომ მგზავრობის საფასური არ გაიზრდებოდა და უკვე 14 ივლისს, თვეზე ნაკლებ ვადაში, ჩვენ მივიღეთ მგზავრობის გაზრდილი საფასური. რეალურად, ეს არის კანონის დარღვევა, რაზეც მერიამ რეაგირება უნდა მოახდინოს. თუ მერია ამაზე თვალს დახუჭავს, მაშინ ვიფიქრებთ, რომ არსებობს გარკვეული ტანდემი და ეს არის ელიტური კორუფციის მაგალითი", - განაცხადა სამუშიამ.
