თბილისის საქალაქო სასამართლოს გადაწყვეტილებით, სამედიცინო სფეროში მომუშავე 15 მეწარმე სუბიექტს ,,წამლისა და ფარმაცევტული საქმიანობის შესახებ" საქართველოს კანონით გათვალისწინებული სამართალდარღვევებისათვის ადმინისტრაციული სახდელის სახით დაეკისრათ ჯარიმა 3 000 ოდენობით და სამართალდარღვევის საგნის კონფისკაცია.
"თბილისის საქალაქო სასამართლოს ადმინისტრაციულ საქმეთა კოლეგიის გადაწყვეტილებით დაკმაყოფილდა საქართველოს შრომის, ჯანმრთელობისა და სოციალური დაცვის სამინისტროს საქვეუწყებო დაწესებულება - სამედიცინო საქმიანობის სახელმწიფო რეგულირების სააგენტოს შუამდგომლობები - სამედიცინო მომსახურების სფეროში მომუშავე 15 მეწარმე სუბიექტის მიმართ, ადმინისტრაციულ სამართალდამრღვევად ცნობისა და სახდელის დადების თაობაზე. საქმეში წარმოდგენილი მტკიცებულებებით, სასამართლომ დაადგინა, რომ ადგილი ჰქონდა შემდეგ სამართალდარღვევებს: ფარმაცევტული საწარმოების მიერ ფარმაცევტული პროდუქციის მომზადების წესებისა და ინსტრუქციით დადგენილი შენახვის პირობების დარღვევას, ასევე ფარმაცევტული პროდუქციის რეალიზაციის წესის დარღვევას, სამკურნალო საშუალებების აღრიცხვის, წარმოების, სტანდარტიზაციის, მარკირების, გადაზიდვა-გადაგზავნის, იმპორტ-ექსპორტის, რეექსპორტის, სერიული აღრიცხვისა და განადგურების დადგენილი წესების დარღვევას", - აღნიშნულია საქალაქო სასამართლოს განცხადებაში.
სასამართლოს მიერ ასევე დადგენილ იქნა, რომ საქართველოს ბაზარზე ფარმაცევტული პროდუქციის დაშვების რეჟიმების გვერდის ავლით, ადგილი ჰქონდა უფლების არმქონე ფარმაცევტული პროდუქტის მიმოქცევის ფაქტს.
