პოლონურ ინვესტიციებს საქართვეოში დიდი პოტენციალი აქვს, ამის შესახებ განცხადება, ჟურნალისტებთან საუბრისას, პრემიერ-მინისტრმა ნიკა გილაურმა ქართულ პოლონური ბიზნესფორუმზე სიტყვით გამოსვლის შემდეგ გაკეთა.
"ორ ქვეყანას შორის ბიზნესი, რომ განვითარდეს რამდენიმე წინაპირობა უნდა არსებობდეს. პირველი, პოლიტიკური სიახლოვე, მეგობრობა და სტრატეგიული ურთიერთობა. მეორე, ორმაგი დაბეგვრისა და სხვა ხელშეკრულებები, რაც უნდა დაიდოს მთავრობებს შორის და მესამე პირდაპირი ფრენები ორ ქვეყანას შორის.
ჩვენ სამივე მათგანი გვავქს. შესაბამისად მიგვაჩნია, რომ დიდი პოტენციალი აქვს პოლონურ ინვესტიციებს საქართველოში და პირიქით ქართულს პოლონეთში" - აღნიშნა გილაურმა.
მისივე თქმით, პოლონეთი არის ერთ-ერთი მთავარი საქართველოს პარტნიორი საერთაშორის არენაზე. იქნება ეს ჩრდილო-ატლანტიკური ალიანსი, თუ ევროკავშირი.
"პოლონეთსა და საქართველოს ძალიან დიდი მეგობრობა აკავშირებს და ისინი არიან ჩვენი ერთ-ერთი ყველაზე აქტიური მხარდამჭერები. ამისთვის კი დიდი მადლობა მინდა გადავუხადო პირადად პოლონეთის პრეზიდენტს საქართველოში ჩამოსვლისთვის" - აცხადებს გილაური.
პრემიერ-მინისტრი იმედს გამოთქვამს, რომ საქართველოში სტუმრად მყოფი პოლონელი ბიზნესმენები სოფლის მეურნეობის, ენერგეტიკისა და ჯანდაცვის სფეროებში უახლოეს მომავალში ინვესტიციებს განახორციელებენ.
შეგახსენებთ, რომ გუშინ, 26 ივლისს, საქართველოს პოლონეთის რესპუბლიკის პრეზიდენტი ბრონისლავ კომოროვსკი და მთავრობის სხვა წარმომადგენლები ეწვივნენ. ოფიციალურ დელეგაციას თან ახლავს პოლონელ ბიზნესმენთა დელეგაცია. დელეგაციაში შემავალი ბიზნესმენები წარმოადგენენ კომპანიებს საფინანსო, სადაზღვევო, საკვები პროდუქტების და ენერგეტიკის სფეროებიდან. მათი მიზანია საქართველოში ბიზნეს პარტნიორების მოძიება და საქმიანი ურთიერთანამშრომლობის დამყარება.
