პატრიარქისა და წმინდა სინოდის პოზიცია კარგი მაგალითი უნდა იყოს იმ ადამიანებისთვის, ვინც ცდილობს ქვეყანაში განხეთქილების პროვოცირებას. ამის შესახებ პარლამენტის თავმჯდომარემ დავით ბაქრაძემ წმინდა სინოდის მიერ მიღებული გადაწყვეტილების შეფასებისას აღნიშნა.
მისი თქმით, ბოლო დღეების განმავლობაში რელიგიური გაერთიანებებისთვის საჯარო სამართლის იურიდიულ პირად დარეგისტრირების შესახებ მიღებულ გადაწყვეტილებაზე კანონით სპეკულაცია და მისი არასწორი ინტერპრეტაცია ხდებოდა.
"იმედს ვიტოვებ, რომ ზოგ შემთხვევაში ეს იყო გამოწვეული იმით, რომ ეს ადამიანები არ იცნობდნენ კანონს, თუმცა იყო მისი მიზანმიმართული ინტერპრეტაციაც", - აღნიშნა ბაქრაძემ.
პარლამენტის თავმჯდომარემ პატრიარქს და სინოდს მადლობა გადაუხადა გონივრული და ბრძნული პოზიციისთვის.
"მადლობას ვუხდი წმინდა სინოდს კომპრომისული გადაწყვეტილებისთვის, რომელიც გუშინ იქნა მიღებული. სინოდის ეს პოზიცია უნდა იყოს იმ ადამიანისთვის კარგი სიგნალი, რომლებიც მუდმივად ჩასაფრებულია და ცდილობს ყველა თემა საკუთარი პოლიტიკური ინტერესისთვის გამოიყენოს, ქვეყანაში დაძაბულობისა და განხეთქილების პროვოცირებისთვის", - მიაჩნია ბაქრაძეს.
