„ქართული პარტიის" თავმჯდომარეს სოზარ სუბარსა და ევროსაბჭოს ადამიანის უფლებათა კომისარს თომას ჰამერბერგს შორის სტრასბურგში გამართული შეხვედრის დროს, სხვა საკითხებთან ერთად, ყურადღება გამახვილდა ფოტორეპორტიორების დაკავებისა და რელიგიური გაერთიანებების სტატუსის თემებზე.
როგორც "ჯი-ეიჩ-ენს" ქართული პარტიიდან აცნობეს, სოზარ სუბარმა თომას ჰამერბერგს მიაწოდა ინფორმაცია იმის შესახებ, როგორ გაუკეთა ხელისუფლებამ იგნორირება საქართველოს საპატრიარქოს (პრაქტიკულად, ხალხის) მოთხოვნას, რომ საკანონმდებლო ცვლილებები ნაჩქარევად კი არა, საჯარო მსჯელობისა და საერთო კონსენსუსის გზით ყოფილიყო მიღებული.
„სტატუსის საკითხის მოწესრიგების საწინააღმდეგო არაფერი გვაქვს, პირიქით, აქამდეც უნდა მოგვარებულიყო, მაგრამ მიუღებელია გადაწყვეტილების მიღების ფორმა - საზოგადოებასთან დიალოგზე უარის თქმა, გადაწყვეტილების ნაჩქარევად მიღება და საზოგადოებაში, მშვიდობის ნაცვლად შფოთის შეტანა, რასაც აუცილებლად გამოიწვევდა პატრიარქისა და მთელი ეკლესიის მოთხოვნის უგულვებელყოფა. რაც ყველაზე საშიშია, ამგვარი აჩქარებით ხელისუფლება ქმნის საზოგადოებაში არატოლერანტული განწყობების გაჩენის საფრთხეს და ამით უმცირესობების უფლებების დაცვას კი არ უწყობს ხელს, პირიქით, მათ მიმართ შეუმწყნარებლობისა და აგრესიის გაჩენას განაპირობებს", - განაცხადა შეხვედრაზე სოზარ სუბარმა.
,,ქართული პარტიის" ლიდერმა ევროკომისარს ასევე მიაწოდა ინფორმაცია ჯაშუშობის ბრალდებით ქართველი ფოტორეპორტიორების დაკავებაზე, რამაც, სოზარ სუბარის განცხადებით, თომას ჰამერბერგის „განსაკუთრებული ინტერესი გამოიწვია".
