"მამუკა არეშიძე არ არის ადამიანი, რომელსაც ვინმე ზეწოლით რამეს გააკეთებინებს", - ამის შესახებ "ჯი-ეიჩ-ენს" პარლამენტის პირველმა ვიცე-სპიკერმა, უმრავლესობის ერთ-ერთმა ლიდერმა მიხეილ მაჭავარიანმა განუცხადა.
მისივე განმარტებით, არეშიძის ინიციატივასთან ხელისუფლებას კავშირი არ აქვს და გავრცელებული ინფორმაცია, თითქოს ამ წინადადების გახმოვანებით, მმართველმა გუნდმა საზოგადოებაში "ნიადაგი მოსინჯა", არასწორია.
"მამუკა არეშიძე არ არის ადამიანი, რომ ვინმეს ზეწოლით რამე გააკეთოს. ეს მისი მოსაზრებაა, რომელსაც არ ვიზიარებთ. ჩემი სახელით გეუბნებით, რომ ამის ნიშან-წყალიც არ არის და საქართველოს ხელისუფლება აგრძელებს არაღიარების პოლიტიკას", - განმარტა მაჭავარიანმა.
ამასთან, ვიცე-სპიკერის შეფასებით, დაკარგული ტერიტორიების დაბრუნება ხანგრძლივი პროცესი და ნერვების ომია, თუმცა საქართველოს ხელისუფლებამ პარტნიორების დახმარებით ბევრი რამ გაკეთა, რომ არაღიარების პოლიტიკა გაგრძელებულიყო.
"რამდენიმე სახელმწიფოს გარდა, რომლებიც ამ საკითხში მარგინალები არიან, ფაქტიურად, აფხაზეთი და ე.წ. სამხრეთ ოსეთი არავის უღიარებია და ისინი არანაირ საერთაშორისო სამართლის სუბიექტებს არ წამოდგენენ. აღიარება ნიშნავს ეთნიკური წმენდის დაკანონებას. მამუკა არეშიძის მოსაზრებას პატივს ვცემ, მაგრამ არ ვიზიარებ", - განუცხადა "ჯი-ეიჩ-ენს" მაჭავარიანმა.
მისივე თქმით, არეშიძეს თავის გზა აქვს, მაგრამ ხელისუფლებას მიაჩნია, რომ ეს გზა შედეგის მომტანი არაა.
"შეიძლება ჩვენი გზა შორია, მაგრამ ბერლინის კედლის დაცემამდე 3-4 წლით ადრეც არავის სჯეროდა ამის. იმპერიები აუცილებლად იშლება", - დასძინა სპიკერმა.
