მთავრობას რეფერენდუმის ჩატარების გარეშე საერთო-სახელმწიფოებრივი გადასახადების 3 წლის ვადით გაზრდის უფლება რჩება. აღნიშნულის შესახებ ნათქვამია "ეკონომიკური თავისუფლების, შესაძლებლობებისა და ღირსების" შესახებ კანონპრექტში.
საკანონმდებლო ინიციატივის თანახმად, საერთო-სახელმწიფოებრივი გადასახადების ახალი სახის შემოღება, გარდა აქციზისა ან საერთო-სახელმწიფოებრივი გადასახადის სახის მიხედვით გადახდის განაკვეთის ზედა ზღვარის გაზრდისა, შესაძლებელია მხოლოდ რეფერენდუმის გზით. რეფერენდუმის დანიშვნის ინიციატივის უფლება მხოლოდ საქართველოს მთავრობას აქვს.
საერთო-სახელმწიფოებრივი გადასახადების ახალი სახის შემოღებად ან ზღვრული განაკვეთის გაზრდად არ ჩაითვლება გადასახადის შემოღება ან ცვლილება, რომელიც არსებული გადასახადის ალტერნატივაა ან ანაცვლებს მას და ამავე დროს არ ზრდის საგადასახადო ტვირთს. საერთო-სახელმწიფოებრივი გადასახადის ახალი სახის შემოღებად ან ზღვრული განაკვეთის გაზრდად არ ჩაითვლება აგრეთვე გადასახადის არსებული ზღვრული განაკვეთის ფარგლებში გადასახადის განაკვეთის ცვლილება.
კანონის ამოქმედების შემდეგ საგადასახადო კოდექსში გაიწერება საერთო-სახელმწიფოებრივი გადასახადების სახეები. ესენია - საშემოსავლო გადასახადი; მოგების გადასახადი; დამატებითი ღირებულების გადასახადი (დღგ); საბაჟო გადასახადი და აქციზი.
საკანონმდებლო ინიციატივაში მთავრობას უფლებამოსილება რჩება საერთო-სახელმწიფო გადასახადების დროებით გაზრდასთან დაკავშირებით. კერძოდ, საქართველოს მთავრობას უფლება აქვს მოითხოვოს გადასახადების დროებით გაზრდა არა უმეტეს 3 წლის ვადით. გადასახადების დროებით გაზრდის შემთხვევაში, რეფერენდუმი არ ტარდება.
