"თავისუფალი დემოკრატების" წევრი, ოპოზიციონერი დეპუტატი გიორგი ცაგარეიშვილი პარლამენტს ხორცის გაძვირებასთან დაკავშირებული სიტუაციის გამოსწორებისკენ მოუწოდებს.
როგორც ცაგარეიშვილმა დღეს, პარლამენტის პლენარულ სხდომაზე აღნიშნა, ხორცზე ფასის ზრდა იმან განაპირობა, რომ საქონლის სასაკლაოებზე დაკვლასა და რეალიზაციასთან დაკავშირებულ ახალ საკანონმდებლო რეგულაციას მხარი სწორედ უმაღლესმა საკანონმდებლო ორგანომ დაუჭირა.
"ამდენად, ხორცის ღირებულების ზრდაზე პასუხისმგებლობა ამ უკანასკნელსაც ეკისრება. მოსახლეობის უმრავლესობა ხორცს გაძვირებამდეც ვერ ყიდულობდა, გაძვირების შემდეგ კი მას საერთოდ ვერ ეკარება", - აღნიშნა ცაგარეიშვილმა.
მისი თქმით, როცა ხელისუფლება კითხულობს, თუ სად არის მონოპოლია, ის სწორედ ხორცის ბიზნესშია, რადგან დედაქალაქში ხორცი ისე ვერ შემოვა, თუ საქონელი თელეთში ან ნატახტარში არ არის დაკლული.
"ამ საკითხის მოგვარება ერთად უნდა ვცადოთ. პრობლემა ნამდვილად არსებობს და მისი მოგვარება ჩვენი ვალია", - აღნიშნა ოპოზიციონერმა დეპუტატმა.
