როგორც დღეს, პარლამენტის პლენარულ სხდომაზე საპარლამენტო უმრავლესობის ლიდერმა პეტრე ცისკარიშვილმა განაცხადა, გასაქირავებელ ფართზე 10 ლარიანი გადასახადის დაწესება წინ გადადგმული ნაბიჯია, როგორც ტურისტულ სექტორში დასაქმებული ინდივიდუალური მეწარმეებისთვის, ასევე დიდი კომპანიებისთვის არის მისაღები.

"ეს არის ფიქსირებული გადასახადი. მათთვის გასაგებია რამდენი უნდა გადაიხადონ, ყველაფერი არის გამჭირვალე, ასევე არ არსებობს ორმაგი წაკითხვის საშუალებები საგადასახადო ადმინისტრაციის მხრიდან და აღარ იარსებებს ე.წ. ქრონომეტრაჟებიც, რასაც თქვენ ეწინააღმდეგებოდით. ახალ რატომ არ მოგწონთ ეს გადასახადი? 10 ლარი არ არის დიდი თანხა, მაშინ, როდესაც ათიათასობით ლარი არის შემოსავალი", - მიმართა "ქრისტიან-დემოკრატებს" ცისკარიშვილმა.

ამასთან, საპარლამენტო უმრავლესობის ლიდერი დაინტერესდა, "როდის იყო ოპოზიცია გულწრფელი, როდესაც იძახდნენ, რომ ქრონომეტრაჟის ნაცვლად გამჭირვალე და ფიქსირებული გადასახადი უნდა ყოფილიყო, თუ ახლა, როდესაც ამ გადასახადს ებრძვიან?"

გარდა ამისა, დეპუტატი სურსათის უვნებლობის საკითხსაც გამოეხმაურა და აღნიშნა, რომ უმცირესობის ლიდერი ამ საკითხის დარეგულირებას ითხოვდა და მთავრობას და უმრავლესობას მოუწოდებდა მომხმარებლის უფლებები დაეცვათ.

"სოფლის მეურნეობის სამინისტრომ ეს გადაწყვეტილება მიიღო და მუშაობა დაიწყო. როდის იყავით მართლები და გულწრფელები, როდესაც სურსათის უვნებლობის საკითხს აყენებდით, როგორც ერთ-ერთ ძირითად კომპონენტს, თუ ახლა, როდესაც ცხოვრებაში მის გატარებას ებრძვით", - მიმართა ცისკარიშვილმა "ქრისტიან-დემოკრატებს".