"დემოკრატიული მოძრაობის ლიდერი ნინო ბურჯანაძე ადასტურებს, რომ მისი მეუღლე ბადრი ბიწაძე რამდენიმე დღის წინ ბოლნისში იმყოფებოდა
"ბოლნისში ორი დღით ნამდვილად იყო ბადრი ბიწაძე ჩემი მამიდის ოჯახში, თუმცა ის ახლა იქ აღარ არის" - განუცხადა ბურჯანაძემ ჟურნალისტებს, თუმცა ბიწაძის ამჟამინდელი ადგილსამყოფელი არ დაუკონკრეტებია.
ამასთან, დემოკრატიული მოძრაობის ლიდერი სამარცხვინოს უწოდებს მისი მეუღლის წინააღმდეგ პროკურატურის მიერ აღძრულ სისხლის სამართლის საქმეს და აცხადებს რომ ბადრი ბიწაძის მიმართ "პოლიტიკური საქმე იკერება".
ამასთან ბურჯანაძემ განმარტა, რომ ბარდი ბიწაძე ბოლოს 26 მაისის ღამეს ნახა, თუმცა რუსთაველის გამზირი მათ ერთი ესკორტით არ დაუტოვებიათ.
"ჩვენ სხვადასხვა ესკორტით დავტოვეთ ტრეიტორია. რაც შეეხება ავარიას, რომელზეც შსს ასე აპელირებს და აცხადებს რომ საჭესთან ხან ჩემი მეუღლე იჯდა ხან ჩემი შვილი ხალხი და მსოფლიო სიმართლეს მალე გაიგებს. ყველაფერი გარკვეულია და ამის საჯაროობა ძალიან მალე მოხდება", - განაცხადა ბურჯანაძემ.
