ოპოზიციონერი დეპუტატი დიმიტრი ლორთქიფანიძე რეადმისიის საკითხთან დაკავშირებით მოქალაქეებისთვის მეტი ინფორმაციის მიწოდებას ითხოვს. ამის შესახებ ლორთქიფანიძემ დღეს, პარლამენტის პლენარულ სხდომაზე გუშინ, საქართველო-თურქეთის საზღვარზე საქართველოს 14 მოქალაქის დაკავების ფაქტს გამოხმაურებისას განაცხადა.
მისი თქმით, 14 ადამიანი ზღვაში წვეთია იმ არალეგალებთან შედარებით, რომლებიც ევროპის ქვეყნებში იმყოფებიან და თუ მათ დროულად და ზუსტად არ აუხსნეს რაედმისიის შეთანხმების შესახებ, ბევრი მათგანი მძიმე მდგომარეობაში აღმოჩნდება.
"ჩვენ კიდევ ერთხელ უნდა ავუხსნათ თანამოქალაქეებს, რომ 2011 წლის 17 მარტიდან ძალაში შევიდა საქართველოსა და ევროკავშირს შორის რეადმისიის შეთანხმება, რომელმაც განსაკუთრებული ახალი სტიმული მისცა ევროკავშირის ქვეყნებში პოლიციას და საემიგრაციო სამსახურებს, რომ გამოავლინონ არალეგალები და გადასცენ საკონსულოებს, რომელებიც ვალდებულნი არიან საკუთარი ბიუჯეტით უზრუნველყონ მათი სამშობლოში დაბრუნება", - აღნიშნა ლორთქიფანიძემ.
ლორთქიფანიძე აცხადებს, რომ მხოლოდ ათენში, 135 ათასი საქართველო მოქალაქე არალეგალურად ცხოვრობს და მათ ყოველდღიურად ემატება იმ ადამიანების რიცხვიც, რომლებიც ყველა საშუალებით და გზით ცდილობენ დატოვონ საქართველო.
