რუსეთის სახელმწიფო სათათბიროს მხრიდან აფხაზეთის ე.წ. საპრეზიდენტო არჩევნებზე დამკვირვებლების გაგზავნა იმ კურსის გაგრძელებაა, რომელიც საერთაშორისო სამართლით დადგენილ ნორმებსა და ცივილიზებული სახელმწიფოსათვის დამახასიათებელი ქმედებებს პირდაპირ ეწინააღმდეგება. უპრეცენდენტოა, როდესაც "ზესახელმწიფოს" სტატუსზე პრეტენზიის მქონე ქვეყანა თვალში ნაცრის შეყრის პოლიტიკას აწარმოებს და არაღიარებული ქვეყნის ტერიტორიაზე დემოკრატიის პაროდიას გვთავაზობს. ახაზეთში ე.წ საპრეზიდენტო არჩევნებზე დამკვირვებლების გაგზავნით, რუსეთი საერთაშორისო პოლიტიკურ არენაზე აფხაზეთის მარიონეტული რეჟიმის ლეგიტიმაციას ცდილობს.
იმ პირობებში, როცა აფხაზეთის მოსახლეობის აბსოლიტური უმრავლესობა განდევნილია მათი საცხოვრებელი ადგილებიდან და თავიანთი პოლიტიკური ნების გამოხატვის შესაძლევლობა არ ეძლევათ, ასეთ შემთხვევაში ხალხის ნების გამოვლენაზე საუბარი ცინიკურია.
აფხაზეთის მთავრობა მოუწოდებს საერთაშორისო საზოგადოებას დროულად მოახდინოს რეაგირება და მისცეს მკაცრი შეფასება ოკუპირებულ აფხაზეთის ტერიტორიაზე რუსეთის უკანონო ქმედებებს.
