ნატოს გენერალური მდივანი ანდრეს ფოგ რასმუსენი საქართველოს სუვერენიტეტისა და ტერიტორიული მთლიანობისადმი მხარდაჭერას კიდევ ერთხელ გამოხატავს.
როგორც რასმუსენმა "ბი-ბი-სის" ეთერში საუბრისას განაცხადა, საქართველო კვლავ რჩება რუსეთთან უთანხმოების ერთ-ერთ მთავარ საკითხად.
რასმუსენმა ბუქარესტის სამიტის გადაწყვეტილებაზეც გაამახვილა ყურადღება და განაცხადა, რომ საქართველო და უკრაინა ალიანსის წევრები აუცილებლად გახდებიან.
"ნატოსა და რუსეთს შორის არსებობს აზრთა სხვადასხვაობა საქართველოს საკითხზე. ჩვენ დაჟინებით მოვითხოვთ საქართველოს ტერიტორიული მთლიანობისა და სუერენიტეტის პატივისცემას. თუმცა, ჩემი აზრით, ზოგიერთ სფეროში შეუთანხმებლობამ არ უნდა დაჩრდილოს ის ფაქტი, რომ ჩვენ გვაქვს საერთო ინტერესები მოსკოვთან ტერორიზმის, ავღანეთის, მასობრივი განადგურების იარაღის გავრცელების საკითხებში. ჩემი აზრით, უნდა განვავითაროთ პრაქტიკული თანამშრომლობა რუსეთთან ამ საკითხებზე. ამასთან, მინდა ვთქვა, რომ ბუქარესტის სამიტზე მიღებული გადაწყვეტილება ძალაში რჩება. ეს გადაწყვეტილება ცხადია: საქართველო და უკრაინა გახდებიან ნატოს წევრები, როცა შეასრულებენ საჭირო კრიტერიუმებს", - განაცხადა რასმუსენმა.
