ქუთაისის მერი ნუგზარ შამუგიამ თანამდებობა დატოვა. სამსახურიდან წასვლის შესახებ განცხადება საკრებულოში უკვე შესულია.
გადაწყვეტილება შამუგიამ მას შემდეგ მიიღო, რაც რამდენიმე დღის წინ საქართველოს პრეზიდენტმა, მიხეილ სააკაშვილმა 30 ნოემბერს ქუთაისში ყოფნის დროს სერიოზულად გააკრიტიკა.
მიხეილ სააკაშვილმა შამუგია ტელეკამერების წინ გააკრიტიკა და გაფრთხილება მისცა.
პრეზიდენტმა ქუთაისის მერს დასუფთავების პრობლემის მოგვარება და სოციალური დახმარების დროულად გაცემა მოსთხოვა. სააკაშვილის განცხადებით, მან მიიღო წერილი სოციალურად დაუცველი ოჯახისაგან და დღეს ამ ოჯახს პირადად ესტუმრა. ოჯახში 14 სული ერთოთახიან ბინაში მძიმე პირობებში ცხოვრობს.
ნუგზარ შამუგია ქუთაისის მერად 2 წელი და 8 თვე მუშაობდა. იგი "ვარდების რევოლუციის" შემდეგ ქუთაისში რიგით მე-7 მერი იყო.
