აგროსასურსათო სექტორის ფერმერები საბანკო და სადაზღვევო სექტორის წარმომადგენლებს შეხვდნენ. სესხის აღებისას აჭარელი ფერმერები გარკვეული შეღავათებით ისარგებლებენ, რომლის დაფარვა თავად ფერმერების მიხედვით შერჩეულ ვადებში მოხდება.
აჭარის სოფლის მეურნეობის სამინისტროს ინფორმაციით, აჭარის სოფლის მეურნეობის სამინისტროს ორგანიზებით, რეგიონის აგროსასურსათო სექტორში მოქმედ (მეციტრუსეობაში, მეთევზეობაში, მეცხოველეობაში, მებოსტნეობასა და დეკორატიულ მემცენარეობაში დასაქმებულ) ფერმერებსა და საბანკო სადაზღვევო სექტორის წარმომადგენლების შეხვედრის მიზანი იყო აგროსასურსათო სექტორის ინფორმირებულობა ბანკების საკრედიტო პოლიტიკის შესახებ, კერძოდ, საბანკო სექტორის დაფინანსების მიმართულებებზე სოფლის მეურნეობაში. საკრედიტო პირობებზე, საპროცენტო განაკვეთზე, საშეღავათო პერიოდზე, სესხის უზრუნველყოფის პირობებზე, შემოსავლების მოცულობაზე და ა. შ..
სამინისტროს ინფორმაციით, შეხვედრაზე საბანკო სექტორიდან მიწვეული იყო 4 ორგანიზაცია, მათ შორის, "პროკრედიტ'' ბანკი, მიკროსაფინანსო ორგანიზაცია "ლაზიკა კაპიტალი'', "ბანკი კონსტანტა'' და "ფინკა საქართველო.'' ხოლო, სადაზღვევო კომპანიებიდან მოწვეულნი იყვნენ კომპანია "იმედი L'' და "ალდაგი ბი სი აი''.
