"ჩემი ვაჟის დაჭერა_რუსული სპეცსამსახურების მორიგი პროვოკაციაა", - მიიჩნევს ჯოხარ დუდაევის ქვრივი ალა დუდაევა.
მისი თქმით, იჩქერიის პირველი პრეზიდენტის ოჯახზე რუსეთის ხელისუფლების მხრიდან ეს მორიგი შეტევაა. ამასთან, ალა დუდაევა მიიჩნევს, რომ ამ ტიპის პროვოკაციებს რუსეთი კვლავაც განაგრძობს.
ალა დუდაევას თქმით, ჯოხარ დუდაევი დამოუკიდებლობის სიმბოლოდ იქცა. მისი ოჯახის წინააღმდეგ დაწყებული კამპანია კი რეალურად, ჩეჩენი ხალხის წინააღმდეგაა მიმართული.
"ჩეჩნები არასდროს ყოფილან სეპარატისტები და მათი მოქმედება ყოველთვის საერთაშორისო კანონებს შეესაბამებოდა", - აცხადებს ჩეჩნეთის პირველი პრეზიდენტის ქვრივი.
ცნობისთვის, ალა დუდაევა ესტონეთის მოქალაქეობის მიღებას წლების მანძილზე ცდილობდა. ესტონეთის ხელისუფლება თითქოს აპირებდა კიდეც მისთვის მოქალაქეობის მინიჭებას, მაგრამ საბოლოოდ უარი უთხრეს. 2006 წლიდან ჩეჩნეთის პრეზიდენტის ქვრივი და მისი ნათესავები ლიტვის დედაქალაქ ვილნიუსში ცხოვრობენ.
შეგახსენებთ, გუშინ ლიტვის ხელისიფლებამ ჯოხარ დუდაევის ვაჟი დეგი დუდაევი საზღვრის უკანონო გადაკვეთის გამო დააკავა. ამასთან, დაკავებულს შვიდი ყალბი პასპორტი აღმოაჩნდა. პირადობის იდენტიფიკაციის შემდეგ დეგი დუდაევი გაათავისუფლეს.
