თეთრი სახლის განცხადებით, აშშ-ის პრეზიდენტმა დონალდ ტრამპმა კანონს რუსეთის წინააღმდეგ მასშტაბური სანქციების დაწესების შესახებ ხელი მოაწერა. ამის შესახებ ნათქვამია თეთრი სახლის მიერ გავრცელებულ განცახდებაში.
"კანონპროექტი HR 5334 - „ლინდსი გრემის 2026 წლის კანონი რუსეთისა და ირანის წინააღმდეგ სანქციების დაწესების შესახებ“ ითვალისწინებს რუსეთის წინააღმდეგ კანონით დადგენილი სანქციების, ტარიფებისა და აკრძალვების მოქმედების გაგრძელებასა და გაფართოებას, ასევე ირანის წინააღმდეგ მოქმედი სანქციების გახანგრძლივებას", - აღნიშნულია დოკუმენტში.
როგორც ცნობილია, აშშ-ის წარმომადგენელთა პალატაში კანონპროექტს - "ლინდსი გრემის რუსეთისა და ირანის წინააღმდეგ სანქციების შესახებ 2026 წლის აქტი“ - მხარი 262-მა კონგრესმენმა დაუჭირა, ხოლო 159-მა ხმა მის წინააღმდეგ მისცა. აშშ-ის სენატმა კი კანონპროექტს მხარი 7 აგვისტოს, 86 ხმით 11-ის წინააღმდეგ დაუჭირა.
კანონპროექტს სახელი სამხრეთ კაროლინელი "რესპუბლიკელის" ლინდსი გრემის პატივსაცემად დაერქვა. გრემი, რომელიც რუსეთის მიმართ ხისტ პოლიტიკას მუდმივად უჭერდა მხარს, ამ კანონმდებლობის აქტიური მხარდამჭერი იყო.
კანონი უკვე ძალაში შევიდა.
დოკუმენტი ითვალისწინებს სანქციების დაწესებას რუსეთის მაღალჩინოსნების, ბანკების, ოლიგარქებისა და ე.წ. „ჩრდილოვანი ფლოტის“ წინააღმდეგ. ამასთან, ის აშშ-ის პრეზიდენტს უფლებას აძლევს, რუსული ნავთობისა და გაზის შემსყიდველი ქვეყნებისთვის 100%-მდე საბაჟო ტარიფები დააწესოს.
კანონპროექტი დონალდ ტრამპს საშუალებას მისცემს 100%-იანი ტარიფები დაუწესოს რუსული ნავთობისა და ბუნებრივი აირის ხუთ ყველაზე დიდ იმპორტიორს და ასევე ხუთ ქვეყანას, რომლებიც რუსეთს ენერგეტიკული სანქციებისთვის გვერდის ავლაში ეხმარებიან. ასევე, კანონპროექტი ირანის წინააღმდეგ მოქმედი სანქციების ვადის გახანგრძლივებას და რუსი მაღალჩინოსნების, ბანკებისა და „ჩრდილოვანი ფლოტის“ წინააღმდეგ სანქციების დაწესებას ითვალისწინებს.
