რუსეთში, უფასა და ორენბურგში კომპანია Ozon-ის საწყობებზე დრონებით თავდასხმა განხორციელდა. ინფორმაციას კომპანია ავრცელებს,
ასევე ვრცელდება ინფორმაცია ბაშკირეთში კომპანიის საწყობში ხანძრის გაჩენის შესახებ, თუმცა ეს ინფორმაცია ოფიციალურად ჯერ დადასტურებული არ არის.
Ozon-ის ინფორმაციით, ღამით დრონების თავდასხმის შედეგად დაზიანდა კომპანიის ლოგისტიკური ობიექტები ორენბურგსა და უფაში. თანამშრომლების ევაკუაცია ოპერატიულად განხორციელდა და, წინასწარი ინფორმაციით, არავინ დაშავებულა. კომპანიაში აცხადებენ, რომ ხანძარი არ გაჩენილა.
უფაში მდებარე ლოგისტიკურმა კომპლექსმა მცირე დაზიანებები მიიღო. ტერიტორიის შესამოწმებლად ობიექტი დროებით დაიხურა და გამყიდველებისგან ამანათების მიღება შეჩერდა. გზაში მყოფი ტვირთები სხვა ობიექტებზე გადამისამართდება.
ორენბურგის ობიექტმა მუშაობა უკვე განაახლა, თუმცა იქ გარკვეული ტიპის გზავნილების მიღება ერთი დღით შეიზღუდა.
27 აგვისტოს ღამით ორენბურგის ოლქის გუბერნატორმა დრონების თავდასხმის საფრთხის შესახებ განაცხადა. ქალაქ ორსკშიც გამოცხადდა გეგმა „ხალიჩა“ და დაწესდა ფრენების შეზღუდვა.
დილით ხელისუფლებამ დრონების თავდასხმის საფრთხის გაუქმების შესახებ განაცხადა და შეზღუდვებიც მოხსნა. ორენბურგისა და ორსკის აეროპორტებმა მუშაობა განაახლეს.
ბაშკირეთის ქალაქ ბლაგოვეშჩენსკში Ozon-ის საწყობში ხანძრის შესახებ ინფორმაცია ამავდროულად, უკრაინულმა მონიტორინგის Telegram-არხმა Exilenova+-მა გაავრცელა ინფორმაცია.
