უკრაინის ეროვნულმა ანტიკორუფციულმა ბიურომ და სპეციალიზებულმა ანტიკორუფციულმა პროკურატურამ ჩხრეკა პრეზიდენტის ოფისის ხელმძღვანელის მოადგილის სამუშაო ადგილზე ჩაატარეს
მედიის ცნობით, უკრაინის ანტიკორუფციულმა ორგანოებმა საგამოძიებო მოქმედებები ქვეყნის პრეზიდენტის ოფისის ხელმძღვანელის მოადგილის, ირინა მუდრას სამუშაო ადგილზე ჩაატარეს. ასევე, ჩხრეკა ჩატარდა აკრძალული პარტიიდან „ოპოზიციური პლატფორმა - სიცოცხლისთვის“ არჩეული სახალხო დეპუტატის ვადიმ სტოლარის სახლშიც.
გამოძიების ინფორმაციით, ჯგუფმა დანაშაულებრივი გზით მიღებული 150 მილიონი გრივნის ნაღდი ფულის ლეგალიზება მოახდინა. თანხა რამდენიმე კონტროლირებადი კომპანიის ანგარიშების გავლით ლეგალურ ბრუნვაში შევიდა, რათა შემდგომ ის „მიდასის“ საქმეში დანაშაულებრივი ორგანიზაციის ერთ-ერთი წევრისთვის გირაოს გადასახდელად გამოეყენებინათ.
ანტიკორუფციული უწყებების ცნობით, სქემაში მონაწილეობდნენ პრეზიდენტის ოფისის ხელმძღვანელის მოადგილე, ყოფილი დეპუტატი, სახელმწიფო ბანკის მმართველობის თავმჯდომარე, სახელმწიფო ბანკის სამეთვალყურეო საბჭოს თავმჯდომარე და სხვა პირები.
გამოძიების ვერსიით, სქემის განსახორციელებლად სახელმწიფო ბანკსა და მასზე კონტროლირებადი საწარმოების ანგარიშებს იყენებდნენ. ორგანიზატორი სქემის თითოეულ ეტაპს ათანხმებდა და აკონტროლებდა.
გამოძიების ინფორმაციით, ივნისის დასაწყისში ორგანიზატორებმა სახელმწიფო Sense Bank-ზე ფაქტობრივი კონტროლი მოიპოვეს, რის შემდეგაც მისი საკუთარი ინტერესებისთვის გამოყენება შეძლეს.
უკრაინის ეროვნულმა ანტიკორუფციულმა ბიურომ ოპერაციას „ფორესტ გამპი“ უწოდა.
