რუსეთის სამარის ოლქში სარაკეტო დარტყმა განხორციელდა. ინფორმაციას უკრაინული მედია ავრცელებს.
ადგილობრივი ხელისუფლების ინფორმაციით, 15 აგვისტოს ღამით სამარაში სამრეწველო ობიექტზე სარაკეტო დარტყმა განხორციელდა.
სამარის ოლქის გუბერნატორმა ვიაჩესლავ ფედორიშჩევმა სამარაზე თავდასხმა დაადასტურა და განაცხადა, რომ სამიზნე „სამრეწველო საწარმო“ გახდა. რუსეთის რეგიონული ხელისუფლების წარმომადგენელს თავდასხმის სხვა დეტალები არ დაუკონკრეტებია.
ასევე OSINT-ანალიზმა, რომელიც ASTRA-მ ჩაატარა, დაადასტურა, რომ სამარაში იწვის საწარმო, რომელიც შესაძლოა სარაკეტო-კოსმოსურ ცენტრ „პროგრესს“ ან საავიაციო ქარხანა „ავიაკორს“ ეკუთვნოდეს. ორივე საწარმოს საწარმოო ტერიტორიები ერთმანეთის უშუალო სიახლოვეს მდებარეობს, ამიტომ ამ ეტაპზე ზუსტად დადგენა, რომელ ობიექტს ეკუთვნის დაზიანებული ობიექტი, ვერ ხერხდება.
სარაკეტო-კოსმოსური ცენტრი „პროგრესი“ რუსეთის სარაკეტო-კოსმოსური ინდუსტრიის ერთ-ერთი მნიშვნელოვანი საწარმოა. ის „როსკოსმოსის“ სტრუქტურაში შედის და „სოიუზ-2“-ის ტიპის რაკეტმზიდებსა და კოსმოსურ აპარატებს აწარმოებს.
