საწვავის აფხაზეთისთვის მიწოდება თეორიულად შესაძლებელი იყო გამოყენებული ყოფილიყო რეინტეგრაციული პროცესის დასაწყებად, თუმცა, არსებული ხელისუფლების პირობებში ეს დიდი ფარსი და კოლაბორაციის, ბანალური სიხარბის გამოხატულებაა და მეტი არაფერი, - ამის შესახებ პოლიტიკის ექსპერტი გია ხუხაშვილი სოციალურ ქსელში წერს.
"საწვავის აფხაზეთისთვის მიწოდება თეორიულად შესაძლებელი იყო გამოყენებული ყოფილიყო რეინტეგრაციული პროცესის დასაწყებად.
თუმცა, არსებული ხელისუფლების პირობებში ეს დიდი ფარსი და კოლაბორაციის, ბანალური სიხარბის გამოხატულებაა და მეტი არაფერი.
ახლა არითმეტიკაზე - ხელისუფლების მათემატიკოსმა სპიკერებმა “რამდენიმე ცისტერნა” ახსენეს.
სინამდვილეში 3000 ტონა ეს მინიმუმ 100 ბენზინმზიდისგან შემდგარი კოლონაა.
ნუ, ქოცურ არითმეტიკაში 100-ც რამდენიმეა და 1000-ც", - წერს გია ხუხაშვილი.
ცნობისთვის, მედიაში გავრცელდა ინფორმაცია, რომ აფხაზეთში საწვავზე შექმნილი კრიზის ფონზე, საწვავი საქართველოს კონტროლირებადი ტერიტორიიდან შევიდა. დღეს პრემიერ-მინისტრმა, ირაკლი კობახიძემ მთავრობის ადმინისტრაციაში გამართულ ბრიფინგზე ეს ინფორმაცია დაადასტურა და დააკონკრეტა, რომ საწვავი არა ხელისუფლებამ, არამედ ბიზნესმა კანონის დაცვით შეიტანა.
საწვავის მიწოდების ფაქტი დაადასტურა ოკუპირებული აფხაზეთის ე.წ. ხელისუფლებამაც.
