რუსული „ჩრდილოვანი ფლოტის“ ტანკერ Caroline Bezengi-დან დაღვრილმა ნავთობმა ომანის სანაპიროს მიაღწია. ამის შესახებ Reuters გაერო-ს საერთაშორისო საზღვაო ორგანიზაციაზე (IMO) დაყრდნობით წერს.
IMO-ს წარმომადგენლების განცხადებით, ნავთობის ლაქა ამჟამად ომანის კუნძულ ჯაზირატ-ელ-კიბლიას ჩრდილო-აღმოსავლეთით გადაადგილდება. დაბინძურების ნაწილმა უკვე ომანის მატერიკულ სანაპირომდე მიაღწია.
ომანის მთავრობის შეფასებით, ნავთობის ლაქის ფართობი 400 კვადრატულ კილომეტრს შეადგენს.
Greenpeace-ის განცხადებით, დაბინძურების მასშტაბი გაცილებით დიდია და 6 აგვისტოსთვის ნავთობის ლაქის ფართობმა უკვე 600 კვადრატულ კილომეტრს მიაღწია.
სეზონური მუსონი ართულებს დაზიანებულ გემთან მისვლას და სამაშველო სამუშაოებს აფერხებს.
Reuters-ის ცნობით, ტანკერ Caroline Bezengi-ზე, რომელიც კამერუნის დროშით დაცურავს, პრობლემების შესახებ პირველი ცნობები ჯერ კიდევ ივნისის დასაწყისში გავრცელდა. გემი ნოვოროსიისკის პორტიდან, სადაც რუსული ნავთობით დაიტვირთა, აზიის მიმართულებით მიემართებოდა. იემენის სანაპიროსთან, მუკალას პორტის მახლობლად, ტანკერმა გაუმართაობის შესახებ შეტყობინება გაავრცელა, რის შემდეგაც იგი ომანისკენ გადაადგილდა და საბოლოოდ მეჩეჩზე დაჯდა.
ინციდენტის დეტალები ოფიციალურად არ გახმაურებულა, თუმცა რეგიონის საზღვაო ინდუსტრიის წყაროები Reuters-ს ეუბნებიან, რომ გემზე აფეთქება მოხდა. ტანკერზე თავდასხმის შესახებ ინფორმაცია არ გავრცელებულა. Reuters-ის მიერ მოპოვებული ადრეული შეფასებებიც მიუთითებდა, რომ ბორტზე აფეთქება იყო მომხდარი, თუმცა მისი მიზეზი ამ დრომდე დადგენილი არ არის.
ამასთან, OSINT-პროექტი Russian Forces Spotter ვარაუდობდა, რომ ტანკერი შესაძლოა საზღვაო ნაღმზე აფეთქებულიყო.
