რუსეთის ყოველი ნაბიჯი - ბალისტიკური რაკეტების წარმოების გაზრდა, ჩრდილოკორეული ტექნიკის შემოტანა, მობილიზაციისთვის მზადება აჩვენებს, რომ მოსკოვი არა მშვიდობისთვის, არამედ ესკალაციისთვის ემზადება, - ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს.
ზელენსკი კიევსა და ზაპოროჟიეზე, ასევე უკრაინის სხვა რეგიონებზე რუსეთის თავდასხმას ეხმიანება.
"რუსეთის მიერ ზაპოროჟიეზე განხორციელებული იერიშის შედეგების აღმოსაფხვრელად საგანგებო სამსახურები წუხანდელი ღამიდან მუშაობენ. ქალაქს ჩრდილოკორეული ბალისტიკური რაკეტებით, „ცირკონებითა“ და მართვადი საავიაციო ბომბებით დაესხნენ თავს. ეს იყო სასტიკი იერიში, რომლის მიზანიც კონკრეტულად სამოქალაქო ინფრასტრუქტურისთვის მაქსიმალური ზიანის მიყენება იყო.
სამწუხაროდ, ამ დროისთვის ქალაქში 6 ადამიანი დაიღუპა, 19 კი დაშავდა. ვუსამძიმრებ მათ ოჯახებსა და ახლობლებს. მაშველები ერთ-ერთ დარტყმის ადგილზე ხანძრის ჩაქრობას კვლავ აგრძელებენ.
კიევში სარაკეტო დარტყმის შედეგად ინფექციური საავადმყოფოს შენობა და სავაჭრო ობიექტები დაზიანდა.
დრონებით ტერორი თითქმის ყოველდღიურად გრძელდება ჩვენი ფრონტისპირა დასახლებების წინააღმდეგ. ღამით ხერსონსა და ხარკოვში ქვესადგურები დაზიანდა, რის შედეგადაც ელექტროენერგიის მიწოდება შეწყდა. ყველა შესაბამისი სამსახური ოჯახებისთვის ელექტროენერგიის აღსადგენად მუშაობს.
თავდასხმის ქვეშ ასევე მოექცა დონეცკის, დნიპროპეტროვსკისა და მიკოლაივის ოლქები. რაკეტების გარდა, რუსეთის ძალებმა უკრაინის წინააღმდეგ 120-ზე მეტი დრონი გამოიყენეს, რომელთა უმეტესობა რეაქტიული ძრავით აღჭურვილი „შაჰედები“ იყო.
რუსეთის ყოველი ნაბიჯი - ბალისტიკური რაკეტების წარმოების გაზრდა, ჩრდილოკორეული ტექნიკის შემოტანა, მობილიზაციისთვის მზადება აჩვენებს, რომ მოსკოვი არა მშვიდობისთვის, არამედ ესკალაციისთვის ემზადება.
მსოფლიომ ახლა უნდა იმოქმედოს და არ უნდა დაელოდოს. საჭიროა სანქციების ზეწოლის გაძლიერება, განსაკუთრებით იმ საწარმოების წინააღმდეგ, რომლებიც რუსეთის ომს ამარაგებენ, ასევე უკრაინისთვის მეტი საჰაერო თავდაცვის საშუალებების მიწოდება. ეს ყველაფერი აუცილებელია იმისთვის, რომ მშვიდობას შანსი მიეცეს.
მადლიერი ვარ ყველას, ვინც დახმარებას გვიწევს", - წერს ზელენსკი.
