ჩრდილოეთ კორეის სარაკეტო დანაყოფი რუსეთში განლაგდა. ის, შესაძლოა აღჭურვილი იყოს 120 ბალისტიკური რაკეტითა და ექვსი გამშვები დანადგარით, რომლებიც უკრაინის წინააღმდეგ დარტყმებისთვის იქნება გამოყენებული.
ამის შესახებ უკრაინის სამხედრო დაზვერვის სამსახურის წარმომადგენელმა განაცხადა. იუწყება Reuters
გამოვემა აღნიშნავს, რომ უკრაინა მაღალი კლასის საჰაერო თავდაცვის სისტემების მწვავე დეფიციტს განიცდის, ხოლო რუსეთი ცდილობს ამ მდგომარეობის გამოყენებას და სულ უფრო ხშირად იყენებს ბალისტიკურ რაკეტებს, რომელთა ჩამოგდებაც განსაკუთრებით რთულია.
რუსეთმა 2023 წლის ბოლოდან უკრაინის წინააღმდეგ ათობით ჩრდილოკორეული ბალისტიკური რაკეტა გამოიყენა, თუმცა ჩრდილოეთ კორეის სარაკეტო ძალების განთავსება მოსკოვსა და ფხენიანს შორის უკვე არსებული ფართო სამხედრო თანამშრომლობის კიდევ უფრო გაფართოებას ნიშნავს.
უკრაინის თავდაცვის სამინისტროს მთავარი სადაზვერვო სამმართველოს წარმომადგენლის, ანდრიი ჩერნიაკის განცხადებით, რუსეთი გეგმავს დაახლოებით 90 ჩრდილოკორეელი სამხედრო მოსამსახურისგან შემდგარი სარაკეტო დანაყოფის განთავსებას რუსეთის ვორონეჟის ოლქში, რუსეთის 112-ე სარაკეტო ბრიგადის შემადგენლობაში.
მისი თქმით, პერსონალისა და რაკეტების ნაწილი რუსეთში უკვე გაიგზავნა, თუმცა მათი საბოლოო რაოდენობის შესახებ მოლაპარაკებები მოსკოვსა და ფხენიანს შორის მომავალ თვეში გაიმართება.
გასულ კვირას, 2025 წლის აგვისტოს შემდეგ პირველად, რუსეთმა უკრაინაზე იერიშის დროს ჩრდილოეთ კორეული რაკეტა გამოიყენა.
