რუსული წყაროების ინფორმაციით, 18 ივნისის დილას უკრაინულმა უპილოტო საფრენმა აპარატებმა მოსკოვისა და მოსკოვის ოლქის მიმართულებით მორიგი იერიში მიიტანეს.
მოსკოვის მერის, სერგეი სობიანინის განცხადებით, საჰაერო თავდაცვის სისტემებმა 43 დრონი გაანადგურეს, თუმცა გავრცელებული ცნობებით, რამდენიმე უპილოტომ სამიზნემდე მიღწევა მაინც შეძლო.
სოციალურ ქსელებში გავრცელებულ ვიდეოებში ჩანს ხანძრის რამდენიმე კერა მოსკოვის კაპოტნის რაიონში მდებარე ნავთობგადამამუშავებელი ქარხნის ტერიტორიაზე. კადრებში ასევე ჩანს შავი კვამლის სქელი ღრუბლები, რომლებიც ქალაქის სხვადასხვა რაიონიდანაც შეინიშნება.
ამ ეტაპზე ოფიციალურად არ გავრცელებულა ინფორმაცია დაზიანებების მასშტაბისა და დაშავებულების შესახებ. უკრაინულ მხარეს მომხდართან დაკავშირებით კომენტარი ჯერ არ გაუკეთებია.
„საჰაერო თავდაცვის ძალები მასირებული შეტევის მოგერიებას აგრძელებენ. რამდენიმე უპილოტო საფრენმა აპარატმა მოსკოვის ნავთობგადამამუშავებელ ქარხანამდე მიღწევა შეძლო. მიმდინარეობს შედეგების ლიკვიდაციის ღონისძიებები“, - დაწერა დილის მოსკოვის მერმა.
კაპოტნის ნავთობგადამამუშავებელ ქარხანაზე იერიში რუსეთის სამხედრო და ეკონომიკური შესაძლებლობებისთვის მნიშვნელოვანი დარტყმაა. საწარმო კრემლიდან დაახლოებით 15 კილომეტრში მდებარეობს და რუსეთის დედაქალაქის საწვავის ინფრასტრუქტურის ერთ-ერთ უმნიშვნელოვანეს ობიექტს წარმოადგენს.
ღია წყაროების მონაცემებით, ქარხანა მოსკოვის რეგიონის ბენზინის მოთხოვნის დაახლოებით 40%-ს და დიზელის საწვავის მოთხოვნის 50%-ს უზრუნველყოფს. გარდა ამისა, საწარმო აწარმოებს საავიაციო საწვავსაც, რომელიც სამხედრო საჭიროებებისთვის გამოიყენება.
ამ მიზეზით, ობიექტის დაზიანება არა მხოლოდ ენერგეტიკულ, არამედ სამხედრო-ლოჯისტიკურ მნიშვნელობასაც ატარებს, განსაკუთრებით იმ ფონზე, როდესაც უკრაინა რუსეთის სტრატეგიულ ინფრასტრუქტურაზე დრონებით დარტყმების კამპანიას აგრძელებს.
