რუმინეთის საგარეო საქმეთა სამინისტრომ 29 მაისის ღამეს ქალაქ გალატში მრავალბინიან საცხოვრებელ კორპუსზე დრონის ჩამოვარდნას რუსეთის მხრიდან „სერიოზული და უპასუხისმგებლო ესკალაცია“ უწოდა.
ამის შესახებ რუმინეთის საგარეო საქმეთა სამინისტროს 29 მაისს დილით გავრცელებულ განცხადებაშია ნათქვამი.
უწყებაში აღნიშნეს, რომ დრონი, რომელიც უკრაინაში ინფრასტრუქტურულ ობიექტებზე თავდასხმაში მონაწილეობდა, გალათში ჩამოვარდა და საცხოვრებელი სახლის სახურავზე ხანძარი გამოიწვია. ორი ადამიანი მსუბუქად დაშავდა, ხოლო შენობის მცხოვრებლების ევაკუაცია განხორციელდა.
„ეს ინციდენტი რუსეთის ფედერაციის მხრიდან სერიოზულ და უპასუხისმგებლო ესკალაციას წარმოადგენს. რუმინეთი ამ საერთაშორისო სამართლისა და მისი საჰაერო სივრცის მძიმე დარღვევის საპასუხოდ აუცილებელ დიპლომატიურ ზომებს მიიღებს“, - ნათქვამია რუმინეთის საგარეო საქმეთა სამინისტროს განცხადებაში.
უწყებაში ასევე დაამატეს, რომ რუმინეთმა მოკავშირეებსა და ნატო-ს გენერალურ მდივანს ინციდენტის გარემოებების შესახებ ინფორმაცია მიაწოდა და დრონებთან ბრძოლის საშუალებების გადაცემის დაჩქარების თხოვნით მიმართა.
„რუსეთის ფედერაცია კვლავ აგრესორ სახელმწიფოდ რჩება, რომელიც უკანონო ომს აწარმოებს, რასაც სერიოზული შედეგები აქვს რეგიონული უსაფრთხოებისა და მოქალაქეების უსაფრთხოებისთვის. რუსეთის ფედერაცია პირდაპირ პასუხისმგებელია ამ მძიმე და უპასუხისმგებლო ქმედებებზე“, - განაცხადეს რუმინეთის საგარეო საქმეთა სამინისტროში.
რუმინეთის საგარეო უწყების განცხადებით, ქვეყანა „მაქსიმალური სიმტკიცით“ იმოქმედებს, რათა რუსეთის ფედერაციაზე საერთაშორისო ზეწოლა გაძლიერდეს დაუყოვნებელი და ყოვლისმომცველი ცეცხლის შეწყვეტის მისაღწევად.
შეგახსენებთ, რუმინეთის სასაზღვრო ქალაქ გალატში რუსული დრონი მრავალსართულიან საცხოვრებელ კორპუსს შეეჯახა, ბინა დააზიანა, რის შედეგადაც ხანძარი გაჩნდა. დაშავდა ორი ადამიანი.
